Me besimin se për shumë arsye, Peja se do të vazhdojë të qeveriset nga LDK-ja, kryetari i këtij subjekti politik, Lumir Abdixhiku, së bashku me kandidatin për kryetar, Gazmend Muhaxheri, mbajtën tubim elektoral me banorët e kësaj komune. Në këmbim të votës së pejanëve, mes tjerash, ata u zotuan për investime në turizëm dhe përkrahje të bizneseve, me ulje të taksave.
Fushatën elektorale për zgjedhjet lokale të balotazhit me 9 nëntor, Lidhja Demokratike e Kosovës sot e përqendroi në Pejë. Në kërkim të votës për Gazmend Muhaxherin, kandidatin e këtij subjekti politik për kryetar të komunës, ishte edhe kryetari i partisë, Lumir Abdixhiku.
Para pejanëve, ai tha se kësaj komune, i duhet vazhdimi edhe për një mandat i qeverisjes Muhaxherit dhe qeverisja e LDK-së.
Abdixhiku tha se vetëm me LDK-në dhe Muhaxherin si kryetar, do të realizohen projektet që bukuritë e Rugovës të kenë planin meritor për turizëm, ndërsa bizneset e qytetit të mbështeten duke u lehtësuar barrën tatimore.
Kreu i LDK-së deklaroi se ky qytet vazhdon të jetë një bastion i fuqishëm i frymës rugoviane dhe se pejanët duan ta vazhdojnë qeverisjen e njëjtë e me plane të reja, edhe për katër vitet e ardhshme.
Më pas, kandidati për kryetar të Pejës nga LDK-ja, Gazmend Muhaxheri, u shpreh i bindur në fitoren e 9 nëntorit. Ai tha se projektet madhore që do ta lehtësojnë jetën e qytetarit, ende nuk kanë përfunduar, andaj e kërkoi votën e tyre edhe për një mandat.
Pas takimit me përkrahësit e kësaj partie, lideri i Lidhjes Demokratike të Kosovës Lumir Abdixhiku dhe kandidati për kryetar të komunës Gazmend Muhaxheri, e bënë një shetitje në sheshin e Pejës.
