Agjencia e Ushqimit dhe Veterinarisë së Republikës së Kosovës (AUV) ka njoftuar se ndalon importin e shpezëve të gjalla dhe produkteve të tyre nga Italia, pas konfirmimit të pranisë së sëmundjes Avian Influenza (Gripi i Shpezëve), serotipi me patogjenitet të lartë HPAI–H5N1, në disa rajone të këtij shteti.
Sipas raportit të fundit të Organizatës Botërore për Shëndetin e Kafshëve (WOAH) dhe Komisionit Evropian, sëmundja është përhapur në ferma komerciale dhe në shpezët e egra në Regjionin Emilia-Romagna dhe Lombardia të Italisë.
“Në përputhje me dispozitat përkatëse të legjislacionit në fuqi dhe në zbatim të masave parandaluese për mbrojtjen e shëndetit të kafshëve dhe sigurisë ushqimore në Republikën e Kosovës, AUV vendos si vijon: Ndalohet importi i kafshëve të gjalla, shpezëve dhe i produkteve të tyre të cilat e kanë origjinën nga zonat e infektuara të shtetit të Italisë, përveq nëse e kanë origjinën nga fermat e pa prekura me sëmundjen në një rreth prej 50 km. largësi nga zonat e prekura”, thuhet në njoftimin e AUV-it.
Tutje theksohet se vendimi hyn në fuqi menjëherë dhe do të mbetet në zbatim deri në vlerësimin e mëtejshëm të situatës nga autoritetet ndërkombëtare dhe Agjencia e Ushqimit dhe Veterinarisë së Kosovës.
AUV ka bërë të ditur se po monitoron me kujdes situatën epidemiologjike dhe është në bashkëpunim të ngushtë me institucionet vendore dhe ndërkombëtare për të parandaluar përhapjen e kësaj sëmundjeje.
“Publiku dhe operatorët ekonomikë do të informohen me kohë për çdo ndryshim eventual”, përfundon njoftimi.
