Kryetari i Aleancës për Ardhmërinë e Kosovës (AAK), Ramush Haradinaj, ka deklaruar se afati kushtetues për votimin e qeverisë përfundon nesër, ndërsa presidentja e vendit nuk ka mandat të mandatojë askënd për krijimin e qeverisë pa dëshminë se kandidati i propozuar e ka shumicën e nevojshme parlamentare.
Në një reagim në Facebook, Haradinaj ka theksuar se shumica e nevojshme dëshmohet vetëm me nënshkrime të deponuara të deputetëve, dhe se çdo veprim tjetër i presidentes “do të përbënte shkelje të rëndë kushtetuese”.
“Kandidatura e dytë nga VV për qeveri është veç përpjekje për të vazhduar kapjen e institucioneve të shtetit, në kundërshtim me krejt normat kushtetuese e politike,” , ka shkruar Haradinaj.
Ai ka shtuar se “kjo farsë duhet të marrë fund menjëherë” dhe ka bërë thirrje që vendi të shkojë në zgjedhje të jashtëzakonshme.
