Nisma Socialdemokrate, parti që udhëhiqet nga Fatmir Limaj, ka thënë se vendi duhet të shkojë në zgjedhje meqë Kuvendi i Kosovës nuk ka shumicë parlamentare.
“Nisma Socialdemokrate vlerëson se vendi ndodhet në një ngërç të paprecedentë institucional si rezultat i mungesës së vullnetit politik për marrëveshje dhe vendimmarrje të përgjegjshme, dhe si pasojë e përpjekjeve të vazhdueshme për zgjatjen e pushtetit pa shumicë parlamentare dhe pa legjitimitet politik. Sot është e qartë për të gjithë: Kuvendi i Kosovës nuk ka shumicë”, thuhet në komunikatën për media të lëshuar nga kjo parti që ka tre deputetë në Kuvendin e Kosovës.
Sipas Nismës së Limajt, në takimin e fundit me presidenten, të gjitha partitë politike e kanë shprehur qartë dhe zyrtarisht qëndrimin e tyre se në Kuvend nuk ekziston shumicë parlamentare dhe zgjidhja e vetme mbeten zgjedhjet e reja.
“Si e tillë, kjo situatë kërkon veprim të qartë dhe të shpejtë institucional. Presidentja e Republikës ka detyrim kushtetues të respektojë vullnetin e subjekteve politike, vullnet që tashmë është deponuar zyrtarisht. Nisma Socialdemokrate fton Presidenten të mos bëhet pjesë e zvarritjeve politike apo interpretimeve arbitrare që rrezikojnë parimet kushtetuese dhe krijojnë tensione të panevojshme. Roli i Presidentes është të garantojë unitetin kushtetues dhe të sigurojë funksionimin demokratik të shtetit, jo ta shtyjë vendin drejt bllokadës”, thuhet në komunikatën për media që ka lëshuar kjo parti pas propozimit të emrit të Glauk Konjufcës nga lideri i Vetëvendosjes, Albin Kurti, që të jetë mandatar i dytë për krijimin e qeverisë së re.
