Shefi i Zyrës së Bashkimit Evropian në Kosovë, Aivo Orav, në konferencën për medie bashkë me kryeministrin në detyrë të Kosovës, Albin Kurti ka folur për ‘Raportin për Vendin 2025 të përgatitur nga Komisioni Evropian’. Ai tha se BE qëndron i gatshëm që të respektojë aspiratat e vendeve për anëtarësim në BE.
Ai tha se jemi në një kohë vendimtare për Kosovën e BE-në. Për BE-në zgjerimi është imperativ strategjik, një investim në stabilitet, prosperitet e siguri.
“Kur e zbatojmë këtë vizion, zotimi politik të BE-së dhe reformat e ndërlidhur me të janë kyçe. Në shumë vende kemi parë progres të jashtëzakonshëm”, tha Orav.
Orav tha se tani është po aq e rëndësishme që Bashkimi Evropian të përgatitet për një ‘Union më të madh dhe më të fortë’.
Ai tutje shtoi se Komisioni Evropian së shpejti do të paraqesë gjetjet e tij mbi mënyrën se si zgjerimet e ardhshme do të ndikojnë në fushat kryesore të politikave.
Orav foli edhe për formimin e Qeverisë, ai tha se Kosova ka nevojë për një qeveri që bashkëpunon, një qeveri që mbështetet në një shumicë të fortë në Kuvend, e aftë të avancojë liritë themelore për të mirën e qytetarëve të Kosovës.
Ambasadori Orav shtoi se Kosova ka shënuar përparim në gjashtë fusha kryesore: funksionimin e gjyqësorit, zhvillimin social, politikat e transportit, sigurinë e ushqimit, marrëdhëniet e jashtme dhe ndërtimin e kapaciteteve institucionale.
