Policia e Kosovës ka bërë të ditur se gjatë 24 orëve të fundit janë regjistruar disa raste të kanosjes në qytete të ndryshme të vendit, përfshirë edhe raste ku janë përfshirë persona zyrtarë dhe përdorim i armëve pa leje.
Në Ferizaj, është arrestuar një person pasi dyshohet se ka kanosur me fjalë një person tjetër. Me urdhër të prokurorit, i dyshuari është dërguar në mbajtje.
Një tjetër rast më i rëndë është raportuar në Hani i Elezit, ku pas një mosmarrëveshjeje, ankuesi ka deklaruar se është kanosur nga një i dyshuar tjetër. Gjatë kontrollit policor në vendngjarje është gjetur dhe siguruar një granatë, ndërsa njësitet e FSK-së kanë bërë tërheqjen e saj në mënyrë të sigurt. I dyshuari është arrestuar dhe dërguar në mbajtje, ndërsa rasti është iniciuar për kanosje dhe armëmbajtje pa leje.
Në një tjetër rast, në Kthesën e Buqes në Prizren, policia ka arrestuar një të dyshuar pasi ai kishte kanosur një zyrtar policor gjatë shqiptimit të një tikete për kundërvajtje në komunikacion. Me vendim të prokurorit, i dyshuari është dërguar në mbajtje.
Gjithashtu, në Vushtrri, policia ka identifikuar dhe arrestuar më 03.11.2025 një person të dyshuar për kanosje ndaj tre zyrtarëve policorë. Edhe në këtë rast, me urdhër të prokurorit, i dyshuari është dërguar në mbajtje.
