Kryeministri në detyrë i Kosovës, Albin Kurti, ka reaguar me rastin e 5-vjetorit të arrestimit të ish-krerëve të Ushtrisë Çlirimtare të Kosovës (UÇK), duke kërkuar edhe një herë lirimin e tyre nga paraburgimi në Hagë.
Në një deklaratë publike, Kurti kujtoi se më 5 nëntor 2020, menjëherë pasi kishte vendosur lule në varrin e Astrit Deharit, deputeti Rexhep Selimi ishte dërguar në burgun e Hagës, ku vazhdon të mbahet ende.
“Së bashku me të, edhe Hashim Thaçi, Kadri Veseli dhe Jakup Krasniqi ndodhen në paraburgim tash e pesë vjet. Pesë vite pritje, pesë vite pas hekurave, ndërkohë që arsyeja e njëjtë përsëritet në çdo vendim për refuzimin e lirimit: ‘rreziku i ndikimit mbi dëshmitarët’”, ka shkruar Kurti në Facebook.
Ai theksoi se procesi gjyqësor ka hyrë në një fazë të re, pasi Prokuroria e ka përfunduar rastin e saj dhe nuk ka më dëshmitarë për t’u dëgjuar. “Nuk ka më as arsye ligjore, as morale që të mbahen edhe më tej në paraburgim,” ka shtuar kryeministri.
Kurti tha se që nga dita e parë ka qenë i përkushtuar ndaj kësaj çështjeje dhe se përpjekjet për lirimin e ish-krerëve të UÇK-së janë zhvilluar në mënyrë të qetë, “sepse shpesh puna e mirë bëhet pa zhurmë”.
Ai rikujtoi se që në vitin 2014, si kryetar i Lëvizjes Vetëvendosje dhe deputet i Kuvendit, kishte paraqitur argumentet kundër themelimit të Dhomave të Specializuara, ndërsa si kryeministër, ai dhe zyra e tij kanë kërkuar në vazhdimësi lirimin e tyre.
Kurti bëri publike edhe letrën që i kishte dërguar më 21 shtator 2022 presidentes së Dhomave të Specializuara të Kosovës, Ekaterina Trendafilova, ku kërkonte lirimin me kusht të të akuzuarve.
“Sot e bëj publike për një arsye të vetme: sepse besoj se është e drejtë që ata të kthehen në shtëpitë e tyre, të jenë pranë familjeve dhe ta mbrojnë në liri luftën e drejtë çlirimtare të Kosovës,” ka theksuar ai.
Sipas Kurtit, përgjigjja e marrë nga zonja Trendafilova pas dy javësh nuk solli ndryshim në qëndrimet e gjykatës, ndërsa kërkesat e Qeverisë së Kosovës për lirimin e tyre mbeten ende në fuqi.
“Kërkesat tona qëndrojnë akoma, dhe në Kosovë ekzistojnë të gjitha garancitë për një përgjigje pozitive ndaj tyre,” ka përfunduar Kurti.
