Tema e diskutimit “Siguria e grave në vendin e punës” u zhvillua nën organizimin e Agjencisë për Barazi Gjinore, që vepron në kuadër të Zyrës së Kryeministrit. Gjatë takimit u kërkua veprim i koordinuar institucional dhe mbështetje e vazhdueshme për këtë çështje.
U theksua gjithashtu se garantimi i sigurisë për gratë në vendin e punës vazhdon të jetë një sfidë e rëndësishme.
Drejtoresha Ekzekutive e Agjencisë për Barazi Gjinore, Edi Gusia theksoi se “Mospërfshirja adekuate e grave dhe vajzave në tregun e punës nuk është vetëm çështje barazie, ajo është një pengesë serioze për zhvillimin ekonomik të qëndrueshëm të vendit, ku gjysma e potencialit mbetet e pashfrytëzuar”.
Ajo tregoi edhe për faktorët që ndikojnë në pjesëmarrjen e ulët të grave në tregun e punës, e që sipas saj është pengesë serioze.
“Është e vërtetuar se pjesëmarrja e grave në tregun e punës sfidohet nga shumë faktorë: mungesa e institucioneve për përkujdesje ndaj fëmijëve, mungesa e transportit publik, punësimi joformal, përkujdesja për të moshuarit dhe normat kulturore që i kufizojnë gratë. Si pasojë, ato shpesh punojnë në sektorë me paga të ulëta, në kushte jo të dinjitetshme dhe pa mbrojtje sociale. Është e domosdoshme që investimet të jenë të qëndrueshme, të sigurohet vazhdimësi në karrierë profesionale, shëndet fizik e emocional për të punësuarat dhe formalizim i sektorëve që punësojnë më shumë gra. Përdorimi i masave afirmative dhe promovimi i një kulture pune që vlerëson barazinë dhe fleksibilitetin janë thelbësore. Amandamentimi i Ligjit të Punës me vlerësim të ndikimit gjinor dhe reflektimi i buxhetimit përgjegjës gjinor në legjislacion e politika publike janë çështje prioritare për vendin tonë”, pohoi Gusia.
Drejtoresha e Qendrës Kosovare për Studime Gjinore, Luljeta Demolli foli për gjetjet e fundit të Raportit të Progresit për Kosovën, duke theksuar se siguria në vendin e punës mbetet sfidë.
“Raporti i Komisionit Evropian na kujton se progresi në këtë fushë është i kufizuar dhe se çështjet gjinore duhet të adresohen më strukturalisht. Investimet në barazi gjinore nuk duhet të jenë vetëm përgjigje ndaj pritjeve ndërkombëtare, por iniciativë e institucioneve tona. Gratë ende përballen me diskriminim gjinor, pasiguri në marrëdhënien e punës dhe ngarkesë të dyfishtë mes punës së paguar dhe përkujdesjes familjare”, tha ajo.
“Shëndeti mendor i grave punëtore mbetet i neglizhuar dhe trajtimi institucional është i kufizuar, ndonëse ky është dimension thelbësor për sigurinë dhe mirëqenien në vendin e punës”, shtoi Demolli.
Zëvendëskryetari i Seksionit për Bashkëpunim në Zyrën e BE-së në Kosovë, Alessandro Bianciardi, theksoi mbështetjen e BE-së për fuqizimin e grave dhe përmirësimin e sigurisë në punë.
“Jemi këtu sepse siguria në vendin e punës nuk është në nivelin e duhur. Bashkimi Evropian e ka përkrahur këtë iniciativë sepse çdo person duhet të ndihet i sigurt. Përmes barazisë gjinore në punë nënkuptohet adresimi i barrierave që i kufizojnë gratë. Fuqizimi i mekanizmave institucionalë është kyç për zbatimin e të drejtave të njeriut. Shoqëria civile mbetet partnere e rëndësishme në mbështetjen e viktimave. Ky takim duhet të na fuqizojë që siguria dhe potenciali i grave të jenë të përkrahura në botën e punës. Zëri i grave duhet të dëgjohet dhe ne do t’u qëndrojmë prapa me dyer të hapura për të udhëhequr të ardhmen e Kosovës”, tha Bianciardi.
