Në nëntëvjetorin e vdekjes së aktivistit të Lëvizjes Vetëvendosje, Astrit Dehari, kryeministri në detyrë, Albin Kurti, dhe kryetari i Kuvendit të Kosovës, Dimal Basha, kanë bërë homazhe pranë varrit të tij në Prizren, duke kërkuar edhe një herë drejtësi për rastin që ende nuk është zbardhur.
Kurti ka theksuar se Astrit Dehari “u mbyt në burgun e Prizrenit për shkaqe politike” dhe se mungesa e drejtësisë për këtë rast përbën një dështim të madh të sistemit të drejtësisë në Kosovë.
Sipas tij, për nëntë vite me radhë janë ndërruar katër prokurorë, por pa asnjë përparim të dukshëm në hetime.
“Astrit Dehari ishte në burg për shkaqe politike, për shkak se nuk pajtohej me pushtetin e atëhershëm. Ai u mbyt në burg, dhe sot e kësaj dite nuk ka as të akuzuar, as të gjykuar, e lëre më të dënuar për rastin e tij. Si Republikë e Kosovës, jemi të gatshëm dhe të interesuar ta ndihmojmë Prokurorinë e Shtetit, por nëntë vjet janë shumë”, ka deklaruar ai.
Kurti ka theksuar se vdekja e Deharit mbetet “një plagë e hapur” dhe i bëri thirrje sistemit të drejtësisë të angazhohet më seriozisht për zbardhjen e rastit, duke propozuar që të bëhet hetim edhe për hetimet fillestare.
“Në punën e Prokurorisë dhe të sistemit të drejtësisë nuk mund të ndërhyjmë, por shprehim gatishmërinë tonë për drejtësi. Ka shumë mundësi që duhet hetuar edhe procesi i hetimit fillestar, sepse nëse diçka nis mbrapsht, vështirë se përfundon mirë”, ka deklaruar ai.
Ndërsa kryetari i Kuvendit, Dimal Basha, e quajti rastin e Deharit “aktin më të rëndë që ka përjetuar vendi pas luftës”, duke e krahasuar me praktikat e ish-Jugosllavisë. Ai theksoi se Astrit Dehari ishte mbajtur 67 ditë në burg pa aktakuzë dhe pa u marrë në pyetje.
“Edhe në kohën e Jugosllavisë regjimi ka sajuar aktakuza, por Astrit Deharin e kanë mbajtur në burg 67 ditë pa aktakuzë. Kjo është një prej padrejtësive më të mëdha që ka përjetuar vendi ynë. Bashkë me kryeministrin dhe familjen Dehari, bëjmë thirrje që të hetohen edhe hetimet që janë bërë deri tani”, ka theksuar Basha.
Prindërit e Astrit Deharit, Avni dhe Xhemile Dehari, po ashtu kërkuan drejtësi për djalin e tyre, duke kritikuar institucionet për mosveprim.
Nëna e të ndjerit, Xhemilja, ka theksuar se “Prokuroria nuk ka punë me Vetëvendosjen, sepse Astriti është vrarë për shkaqe politike”, ndërsa kërkoi që prokurorët e përfshirë në hetimet e para të dalin e të thonë të vërtetën.
“Nëntë vite nuk janë pak për të pritur drejtësinë. Astriti politikisht është mbyllur dhe vrarë në burgun e Prizrenit. Le të dalin e ta thonë të vërtetën ata që e dinë çfarë ka ndodhur”, ka deklaruar ajo.
Ndërsa babai i tij, Avni Dehari, tha se mosfunksionaliteti i sistemit të drejtësisë duket të jetë i qëllimshëm.
Astrit Dehari, aktivist i Lëvizjes Vetëvendosje dhe student i Fakultetit të Mjekësisë, ndërroi jetë më 5 nëntor 2016 në Qendrën e Paraburgimit në Prizren, në rrethana ende të paqarta. Rast që, edhe pas nëntë vitesh, mbetet i pazbardhur.
