Tri sindikatat e transmetuesit publik kanë paralajmëruar protesta, njëra të enjten, kurse dy të tjerat të hënën.
Të enjten Sindikata e Punëtorëve e Radio Televizionit të Kosovës (SPERTK), do të organizojë protestë para hyrjes së Kanalit të Parë të RTK-së, ndërsa dy sindikatat e Radiotelevizionit të Kosovës, Sindikata e Pavarur e RTK-së dhe Shoqata Sindikale e Radio Kosovës, kanë paralajmëruar protestë të hënën më 10 nëntor, për shkak të mos-ekzekutimit të buxhetit të institucionit dhe vonesës së pagave mujore për muajin tetor.
Në një reagim të përbashkët, të dy sindikatave kanë shprehur shqetësimin e thellë dhe pakënaqësinë e madhe të punëtorëve ndaj situatës së krijuar, duke e cilësuar atë si shkelje të të drejtave themelore të punëtorëve.
“Vonesa të tilla të pajustifikueshme po e godasin drejtpërdrejt sigurinë ekonomike e sociale të punëtorëve të RTK-së, të cilët, edhe sot më 5 nëntor, mbeten pa paga mujore dhe pa mundësi për të përmbushur obligimet ndaj bankave apo nevojat bazike familjare”, thuhet në reagim sindikal.
Ky veprim, sipas tyre, përbën shkelje të të drejtave themelore të punëtorëve për pagë të rregullt dhe kushte të denja pune. Njëkohësisht, situata e krijuar, sipas sindikatave, rrezikon pavarësinë editoriale dhe misionin publik të RTK-së si transmetues i pavarur dhe shërbyes i interesit qytetar.
“Është e papranueshme që një institucion publik me rol kushtetues në informimin e drejtë dhe të paanshëm të qytetarëve, të lihet në pasiguri financiare për shkak të neglizhencës institucionale. Në shenjë pakënaqësie për mungesën e pagave ndaj 700 punëtorëve të RTK-së, Sindikata e Pavarur e RTK-së dhe Shoqata Sindikale e Radio Kosovës do të organizojnë protestë të hënën, më 10 nëntor, nga ora 11:00, para ndërtesës së Kuvendit të Kosovës”, thuhet në njoftim.
Sindikatat u bëjnë thirrje me këtë rast, edhe njëherë Kuvendit të Kosovës si themelues i RTK-së, Presidentes së Republikës dhe Qeverisë në detyrë, që të ndërmarrin menjëherë hapat e nevojshëm për ekzekutimin urgjent të buxhetit të mbetur të RTK-së, në mënyrë që të garantohet funksionimi normal i transmetuesit publik dhe dinjiteti i punëtorëve të tij.
Kujtojmë se në RTK ekzistojnë tri sindikata që përfaqësojnë punëtorët e transmetuesit publik. Këto dy sindikata (Sindikata e Pavarur e RTK-së dhe Shoqata Sindikale e Radio Kosovës) kanë paralajmëruar protestë për të hënën, ndërsa Sindikata e Punëtorëve të RTK-së (SPERTK) ka paralajmëruar protestë të enjten më 6 nëntor para hyrjes së RTK-së në ora 11:00.
