Kreu i Lidhjes Demokratike të Kosovës, Lumir Abdixhiku, ka kritikuar veprimet e Qeverisë në detyrë lidhur me ndarjen e 100 eurove të premtuara për studentët dhe mesazhet e dërguara në telefon pak ditë para balotazhit.
Përmes një postimi në Facebook, Abdixhiku e ka quajtur këtë veprim “përpjekje të një regjimi në rënie për të blerë vota” tri ditë para balotazhit. Ai ka thënë se qeveria po përpiqet të blejë votën e studentëve me para publike.
“Të ardhmen që ua vodhi, në shtetin më të varfër e më të izoluar në Evropë, me arsimin ndër më të fundit në botë, provon t’ua blejë me 100 euro për votë – tre ditë para balotazhit. Një regjim i frikësuar dhe në rënie të lirë, po trajton studentët e Kosovës si material shitblerje zgjedhor”, ka shkruar ai.
Kreu i LDK-së ka thënë se studentët nuk do të ndikohen nga mesazhe të tilla dhe se do t’i përgjigjen qeverisë me votë.
“Studentët drejtojnë kohë, rrëzojnë regjime e përcaktojnë epokë. Prandaj, këta SMS ‘cringe’, para zgjedhjeve nuk blejnë as heshtjen, as shpresën. As votën. I keni nënçmuar. Do t’iu kthejnë përgjigje këtë të diel me votë. Kosova është shumë më e mençur sesa po e trajton kryepopullisti sot!”, ka theksuar Abdixhiku.
