Takimi me organizatat e dala nga lufta e UÇK-së ishte aktiviteti elektoral që sot e mbajti në Viti Sokol Haliti, kandidat i LDK-së për kryetar të kësaj komune. Duke kërkuar mbështetjen e kësaj kategorie të shoqërisë edhe për një mandat, Haliti tha se gjatë qeverisjes së tij do t`i ketë në fokus të veçantë veteranët, invalidët dhe familjet e dëshmorëve, për të qenë, siç tha ai, më afër tyre dhe për t’u dalë krah në çdo sfidë me të cilën përballen.
Kandidati për kryetar të Vitisë nga Lidhja Demokratike e Kosovës, Sokol Haliti, i cili synon edhe një mandat tjetër katërvjeçar në krye të komunës, ka zhvilluar takim elektoral me përfaqësuesit e Organizatat e Veteranëve të Luftës së UÇK-së.
Gjatë këtij takimi, Haliti ka theksuar rëndësinë e ruajtjes së vlerave të luftës çlirimtare dhe të përkushtimit të institucioneve lokale për mbështetjen e familjeve të dëshmorëve, veteranëve dhe invalidëve të luftës.
Ai ka theksuar se në mandatin e tij të ardhshëm do të vazhdojë të jetë pranë tyre me projekte konkrete dhe mbështetje institucionale.
“Kemi qenë koherentë, kemi një bashkëpunim të ngushtë me shoqatat e dala nga lufta. Me ju garantoj mbështetje si rezultat i përgjegjësisë. Unë si kryetar do të jem avangardë i angazhimeve në mbrojtje të kauzës kombëtare dhe shtetërore,” ka deklaruar Sokol Haliti, kandidat për kryetar të LDK-së.
Haliti ka thënë se veteranët e kësaj komune kanë lënë gjurmë, prandaj sipas tij meritojnë kujdes institucional.
Ai ka premtuar ndërtimin e kapaciteteve për këtë kategori të shoqërisë, pasi sipas tij, dëshmorët e kanë dhënë më të shtrenjten e tyre për këtë vend.
“Përveç se kemi me u kujdes për veteranët, pensionistët, të hendikepuarit, edhe për rininë dhe për gjithë kategoritë kemi me u kujdes,” ka deklaruar Haliti.
Kandidati i LDK-së për kryetar të Vitisë, Sokol Haliti, i ka ftuar veteranët e OVL e UÇK-së që ta votojnë atë për kryetar në balotazhin e së dielës, në mënyrë që, siç tha ai, të vazhdojë punët e mira në këtë komunë për të gjithë banorët. Kandidati i LDK-së për kryetar të Vitisë ka për kundërkandidat atë të LVV-së.
