Lëvizja Vetëvendosje mbajti tubim elektoral me banorët e Gjilanit. Kryetari i kësaj partie, Albin Kurti, tha se shumë projekte janë realizuar dhe shumë të tjera e presin këtë komunë, nëse të dielën votohet edhe për një mandat Alban Hyseni, kandidat i kësaj partie për kryetar të Gjilanit.
Në tubimin elektoral në Gjilan, kryetari i LVV-së, Albin Kurti, tha se duhet numëruar orët deri të dielën për ta bërë sërish kandidatin e kësaj partie, Alban Hysenin, kryetar të kësaj komune. Kurti tha se Hyseni është garancia që Gjilani po ecën si duhet drejt zhvillimit.
“Për Spitalin e Gjilanit kemi ndarë 8 milionë euro për investime dhe do të ndërtojmë një poliklinikë moderne. Stadiumi i qytetit po merr formë çdo ditë e më shumë, ndërsa salla e sporteve po renovohet plotësisht. Po përparojnë edhe projekti i Digës së Firajës dhe hekurudha.
Me mirëqeverisjen e kryetarit Alban Hyseni, Gjilani ka filluar të ecë në binarë. Janë parashikuar 2 milionë euro investime në shëndetësi, ndërsa parku industrial i qytetit do të shërbejë si qendër bashkëpunimi. Po ashtu, do të ofrohet një kuzhinë popullore për njerëzit në nevojë, subvencionim i pagës për gratë dhe bursa për gra e vajza. Gjilani do të ketë edhe ngrohjen qendrore. Autobanët, qarkoret dhe hyrjet e daljet e qytetit nuk janë më të largëta”, deklaroi kreu i LVV-së, Albin Kurti.
Kryetari aktual i Gjilanit, Alban Hyseni, i cili po kërkon edhe një mandat në krye të komunës, paraqiti disa nga projektet e kryera në mandatin e kaluar. Më pas, ai kërkoi besimin e bashkëqytetarëve të tij edhe për një mandat.
“Qytet i zhvilluar që synojmë përfundimin e projekteve të nisura. Do të ndërtojmë edhe zonën industriale”, tha mes tjerash Alban Hyseni.
Kandidati i LVV-së për kryetar të Gjilanit ka për kundërkandidat në balotazh atë të LDK-së.
