Partia Demokratike e Kosovës mbajti tubimin elektoral në Klinë. Memli Krasniqi, kryetar i këtij subjekti politik, tha se Klinës i duhet ndryshimi, prandaj kërkoi që të dielën të votohet Sokol Bashota për kryetar të komunës. Ndërsa vetë Bashota premtoi shumë projekte për banorët e kësaj komune, përfshirë ujin e pijshëm dhe sistemin për trajtimin e ujërave të zeza.
Drejtues të Partisë Demokratike të Kosovës, në tubimin elektoral të mbajtur me përkrahësit e vet në Klinë, kërkuan votën për Sokol Bashotën, kandidatin e këtij subjekti politik për kryetar komune. Kryetari i kësaj partie, Memli Krasniqi, tha se e ardhmja e Klinës është në vullnetin e banorëve të saj. Por sipas tij, për të ndryshuar për të mirë, duhet votuar Sokol Bashota.
“Sokoli për Klinën. Sokol Bashota është njeriu që e njeh Klinën, e do Klinën dhe punon për të çdo ditë – me përkushtim, ndershmëri dhe respekt për secilin qytetar. Ai ka qenë dhe mbetet shembulli i udhëheqjes që bashkon njerëzit, që dëgjon e që i jep fjalës peshë. Më 9 nëntor, le ta konfirmojmë besimin për Kolën me votë”, tha ai.
Ndërsa kandidati i PDK-së për kryetar të Klinës, Sokol Bashota, tha se me të si kryetar do të zgjidhen shumë probleme, përfshirë edhe atë të mungesës së ujit të pijshëm. Bashota u shpreh se, përveç projekteve të tjera, edhe ai i trajtimit të ujërave të zeza do të përfundojë brenda vitit të tij të parë në krye të komunës.
Në garën për kryetar të komunës së Klinës, PDK është në koalicion me Lëvizjen Vetëvendosje, ndërsa për kundërkandidat ka atë nga AAK-ja.
