Prokuroria Themelore në Mitrovicë ka intervistuar një person në lidhje me plagosjen dhe rrëmbimin e serbit Millan Vukashinoviq, ngjarje që, sipas Policisë së Kosovës, dyshohet se ka ndodhur më 1 nëntor nga Xhandarmëria e Serbisë në Leposaviq.
Lajmin për RTKlive e ka konfirmuar zëdhënësi i Prokurorisë Themelore në Mitrovicë, Valon Preteni.
“Per rastin, mund të konfirmojmë që është intervistuar një person i afërt me viktimën. Rasti është duke u hetuar në koordinim me Policinë e Kosovës. Në këtë fazë këto janë të dhënat që mund ti ndajmë me ju”, ka thënë Preteni.
Ndërkohë, avokati nga Beogradi, Ivan Niniq, ka dorëzuar kallëzim penal ndaj pjesëtarëve të Ushtrisë Serbe dhe grupit të kryeterorristit Milan Radojçiç, për rastin e plagosjes dhe rrëmbimit të Milan Vukashinoviq.
Niniq ka njoftuar se padia është bërë në emrin e nënës së Vukashinoviqit, pasi që për të nuk dihet asgjë që nga 1 nëntori. Kallëzimi penal është dorëzuar për kryerjen e veprës penale “vrasje në tentativë”.
“Për shkak se për pesë ditë askush nuk ka dhënë asnjë njoftim zyrtar lidhur me qëllimin me armë ndaj Milan Vukashinoviqit, unë, në emër të nënës së tij, kam dorëzuar kallëzim penal te Prokurori i Lartë Publik në Prokuplje, për veprën penale të vrasjes së rëndë në tentativë, kundër personave të panjohur — pjesëtarë të Ushtrisë së Serbisë, policisë ose grupit të Milan R.”, ka thënë avokati në X.
Policia e Kosovës u deklarua për këtë rast më 3 nëntor, duke bërë të ditur se kishte marrë në pyetje dëshmitarë okularë, të cilët kishin dhënë informacione se “persona të maskuar kishin hyrë në territorin e Kosovës, kishin plagosur dhe rrëmbyer viktimën, dhe më pas e kishin dërguar në territorin e Serbisë”.
Millan Vukashinoviq ka qenë i punësuar në Byronë e Sigurimeve të Kosovës në pikën kufitare në Jarinjë, në veri të Kosovës.
