Në prag të nisjes së edicionit të tretë të Festivalit të Këngës në RTK, tapeti i kuq në Pallatin e Rinisë dhe Sportit në kryeqytet është shndërruar në një arenë emocionesh e glamuri, ku personalitete të njohura të artit, politikës dhe kulturës kanë dhënë mesazhe për këtë ngjarje të madhe që nis sonte në orën 21:00 në RTK1 për gazetaret Egzona Rafuna e Medina Pasoma.
Shpresa Gashi, artistja e madhe e skenës shqiptare, është shprehur e lumtur për rikthimin dhe rritjen e nivelit të këtij festivali.
“Jam shumë e kënaqur ngaqë pas një kohe goxha të gjatë fillojë festivali dhe jam e lumtur që ishte shumë dinjitoz vjet dhe besoj se sivjet është edhe më mirë. Një festival që po konkurron me vendet e rajonit. Po shpresoj se sivjet do të jetë edhe më i suksesshëm. Ne kemi rini shumë të talentuar, kemi kompozitorë të mirë, kemi këngëtarë të mirë. Kosova është një mal me talente”, tha Gashi.
Pas saj, në tapetin e kuq foli edhe Dimal Basha, kryetar i Kuvendit të Kosovës, i cili vlerësoi organizimin dhe përkushtimin e RTK-së dhe të gjithë stafit që qëndron pas festivalit.
“Për dallim prej ngërçit që e kemi në Kuvend të Republikës, këtu po duket se kanë shkuar gjërat shumë mirë dhe uroj dhe shpresoj se edhe Kuvendi të funksionojë njëjtë sikur këto organizimet e juaja. Është kënaqësi të jem në edicionin e tretë të Festivalit të Këngës. Kemi pasur dy edicione të jashtëzakonshme, tash edhe pritja e publikut është bërë shumë më e madhe, por megjithatë dua t’iu falënderoj gjithë stafin e televizionit publik për punën e mrekullueshme që e kanë bërë, por edhe MKRS-në për mbështetjen për këtë festival. Kjo tregon se ne kemi artistë të mrekullueshëm, që përveç Festivalit të Këngës do të duhej të ishim edhe pjesë e festivalit evropian të këngës siç njihet Eurovision, gjë të cilën edhe po e dëshmojmë. I dëshiroj të gjithë konkurruesve sukses sonte”, u shpreh Basha.
Ndërsa Arta Jashari, soprano e njohur, e cilësoi festivalin si një hap të rëndësishëm drejt ngritjes së standardeve të muzikës shqiptare.
“Një emocion shumë i veçantë për mua. Një ndjesi tepër e veçantë me gjithë këtë organizim që është bërë. Ky festival ka sjellë një standard të ri në skenën dhe promovimin e muzikës së mirëfilltë shqipe. Ajo që është shumë e rëndësishme është se është një urë lidhëse në mes të brezave të ndryshëm të muzikantëve. U dëshiroj shumë sukses artistëve që do të performojnë sepse është shumë e rrallë për një artist që të ngjitet në një skenë të përmasave të tilla dhe të jetë i përcjellë nga një orkestër tejet profesionale dhe me dy dirigjentë që na kanë prezantuar në tërë botën”, tha ajo.
Në tapetin e kuq atmosferën e gjallë e shtuan edhe emra të tjerë të njohur të muzikës. Endrit Krasniqi, fitues i edicionit të kaluar, u rikthye këtë herë pa stresin e garës, por me shumë entuziazëm.
“Deri të shtunën ndihem si fitues. Gjithnjë është ndjenjë e mirë të jesh pjesë e festivalit. Sonte po ndihem shumë më mirë, sepse vitin e kaluar kam qenë me shumë stres”, tha ai, duke kujtuar këngën e tij të vitit të kaluar “Flas me gjethen”.
Në mesin e të ftuarve ishte edhe Eneida Tarifa, këngëtarja e njohur shqiptare dhe përfaqësuese e Shqipërisë në Eurovision, e cila shprehu mirënjohjen e saj për nismën e RTK-së.
“Jam gëzuar shumë që në vitin e parë për këtë nismë të bukur. E ka pas Kosova një festival kohë përpara, por impenjimi dhe dëshira për ta bërë sa më të madh këtë festival është shumë e madhe dhe e përgëzoj RTK-në për këtë nismë dhe që artistët të kenë një dritare për Evropë. Ngjarjet e tilla jo vetëm duhet ndjekur, por edhe mbështetur. Këngët janë pasqura e një populli, kështu që festivali konfirmon edhe një herë se ne kemi këngë dhe muzikë të bukur”, theksoi Tarifa.
Duke vlerësuar punën e stafit të RTK-së, ajo shtoi: “Skena është madhështore, është e jashtëzakonshme se si në një vend ku më parë s’kishte jetë është gjallëruar dhe është bërë një vend kaq masiv dhe një skenë kaq e bukur. Një përkushtim i jashtëzakonshëm i gjithë stafit tuaj”.
Dilaver Kryeziu, koerograf dhe pedagog, e vlerësoi festivalin si një prej spektakleve më të mëdha në trojet shqiptare.
“Është hera e tretë që vij këtu, por një nga arsyet që po vij është edhe skena që është bërë, pasi e kam parë tashmë. Por është edhe kënaqësia ime më e madhe kur i shoh nxënësit dhe studentët e mi që do të defilojnë në këtë festival, i cili është madhështor dhe një nga spektaklet më të mëdha në trojet shqiptare”, tha ai.
Konkurruesja Teuta Halili ndau emocionet e saj për pjesëmarrjen në këtë ngjarje të madhe muzikore.
“Provat kanë shkuar jashtëzakonisht mirë, gjithçka ka shkuar mbarë dhe vetëm uroj që një fat i tillë të na prijë edhe në netët në vazhdim. Emocion i papërshkrueshëm. Skenë mahnitëse me përmasa gjigante dhe ndihem e privilegjuar të performoj aty. Faleminderit që më është dhënë mundësia”, u shpreh ajo.
Festivali i Këngës në RTK do të sjellë tri net të mbushura me muzikë, kulturë dhe energji artistike, duke përbashkuar breza të ndryshëm të artistëve shqiptarë në një skenë të vetme.
