Drejtori i Përgjithshëm i Policisë së Kosovës, Gazmend Hoxha, ka zhvilluar takim me drejtorin gjeneral të Policisë kroate, Nikola Milina.
Bëhet e ditur se të dy krerët policor nga Kosova e Kroacia kanë folur për rendin e sigurinë publike, në fushën e hetimit dhe luftimit të krimit të organizuar dhe terrorizmit, luftimit të krimit trans kufitar dhe migrimit të paligjshëm, si dhe në fushën e krimeve të luftës, krimeve kibernetike dhe bashkëpunimit ndërkombëtar, diskutime këto që sipas policisë synojnë rritjen e bashkëpunimit dhe avancimin e mëtejmë ndërinstitucional.
Hoxha në Kroaci në vizitë dyditore po qëndron bashkë me drejtorin e Departamentit të Hetimeve, Agron Nezaj, drejtorin e Departamentit të Njësive Speciale, Mentor Shabani, dhe drejtorin e Bashkëpunimit Ndërkombëtar Policor, Arben Paçarizi.
“Delegacioni kosovar, përveç vizitës në Drejtorinë e Përgjithshme, vizitoi edhe Komandën e Ndërhyrjes, ku nga afër u njoftua mbi punën dhe aktivitetet policore që realizohen në këtë qendër, përfshirë prezantimin dhe demonstrimin e pajisjeve teknologjike si dronët, antidronët dhe pajisjet e tjera të njësive speciale”.
Policia e Kosovës thotë se vizita dhe takimet rikonfirmuan bashkëpunimin e përhershëm dhe profesional mes dy organizatave policore, bashkëpunim ky i cili, sipas PK-së, ndikon në lehtësimin e shkëmbimit të informacioneve, realizimin e trajnimeve të avancuara dhe profesionale, si dhe shkëmbimin e përvojave policore në fushën e bashkëpunimit ndërkombëtar dhe zbatimit të ligjit.
Thuhet se krerët e dy policive janë zotuar se do të vazhdojnë bashkëpunimin e ndërsjellë, zbatimin e memorandumeve të mirëkuptimit, si dhe përkrahjen dhe mbështetjen drejt anëtarësimit të PK-së në organizatat ndërkombëtare ligj zbatuese.
