Një aksion i Njësisë për Hetimin e Trafikimit me Narkotikë në Pejë ka përfunduar me zbulimin e një sasie droge dhe një arsenali të tërë armësh në dy fshatra të komunës së Deçanit.
Sipas Policisë së Kosovës, në koordinim me Prokurorinë Themelore të Pejës, më datë 6 nëntor 2025 janë zhvilluar bastisje në pronat e tre personave të dyshuar, në fshatrat Drenoc dhe Isniq.
Gjatë kontrollit janë gjetur dhe sekuestruar: 161.9 gramë substancë e dyshuar narkotike e llojit marihuanë; një armë automatike AK-47; një armë e gjatë gjysmë automatike; një pushkë ajrore (jofunksionale); dy granata dore; 236 fishekë të kalibrave të ndryshëm; pajisje optike dhe pjesë për armë; dy bajoneta; dy peshore elektronike për matjen e narkotikëve; qese për paketim të substancave, si dhe; tre telefona celularë.
Policia ka bërë të ditur se tre të dyshuarit janë arrestuar në vendngjarje. Pas intervistimit, dy prej tyre janë ndaluar me urdhër të prokurorit, ndërsa njëri është liruar në procedurë të rregullt.
Hetimet po vazhdojnë për të sqaruar burimin e armëve dhe lidhjet e mundshme me veprimtari të tjera kriminale.
