Drejtori i Televizionit në RTK dhe njëherësh drejtori i Festivalit të Këngës, Rilind Gërvalla, ka vlerësuar se mbrëmja e parë e Festivalit të Këngës ishte më shumë se një ngjarje artistike dhe se kjo, siç u shpreh ai, tregon se ne dimë ta organizojmë Festivalin, dhe këtë e dëshmuam edhe një herë.
“Mbrëmja e parë e Festivalit të Këngës ishte më shumë se një ngjarje artistike. Ishte një udhëtim emocionesh, një simfoni përkushtimi dhe dashurie për muzikën, që mori formë falë ekipit të mrekullueshëm të RTK-së. Ky kompozim i madh nuk do të mund të ndodhte pa tre dirigjentët tanë brilantë: Lindita Isufi, Alfred Kaçinari dhe Memli Kelmendi. Ju faleminderit për pasionin, profesionalizmin dhe elegancën me të cilën e drejtuat këtë orkestër të bukur artistësh. Ju ishit zemra që rrihte në çdo notë të mbrëmjes!”, ka shkruar Gërvalla në ‘Facebook’.
Ai ka falënderuar të gjithë pjesëmarrësit, këngëtarët, orkestruesit, teknikët, regjisorët, skenografët, redaktorët, kameramanët e çdo anëtar të ekipit të RTK-së që e ktheu këtë festival në një moment të paharrueshëm.
“Ju jeni forca e padukshme pas dritave të skenës, por jehona e punës suaj dëgjohet e shihet kudo. Dhe, mbi të gjitha, faleminderit publikut për dashurinë, për çdo koment, çdo fjalë të mirë e çdo emocion që na keni dhënë. Ne ua kthejmë këtë dashuri me punë, përkushtim dhe një zotim të përbashkët: të përmirësohemi, të rritemi dhe ta çojmë muzikën tonë gjithnjë më lart. Sepse, në fund të ditës, ky festival është i juaji dhe muzika është ajo që na bashkon”, ka shkruar drejtori i Televizionit në RTK dhe njëherësh drejtori i Festivalit të Këngës, Rilind Gërvalla.
