Në Gjakovë, Aleanca për Ardhmërinë e Kosovës e ka përmbyllur fushatën për balotazhin e së dielës për zgjedhjet komunale.
Gjatë këtij takimi me përkrahësit e kësaj partie, kryetari i AAK-së, Ramush Haradinaj, tha se Gjakova tashmë është shndërruar në qendër të zhvillimit ekonomik.
“Me Ardianin në udhëheqje, vërtet do të keni një frymëzim të vazhdueshëm dhe do t’i bëni punët e Gjakovës më së miri. Unë gjithmonë e kam ditur që Gjakova ka potencialin e vet. E kam ditur dhe e kam përjetuar në kohë të vështira, dhe e kam parë se kush janë njerëzit e Gjakovës”, deklaroi kreu i AAK-së.
Kandidati për kryetar të komunës së Gjakovës nga AAK-ja, Ardian Gjini, tha se në komunën që ai e ka drejtuar për dy mandate me radhë, kontribuuesit kryesor të buxhetit komunal ka qenë sektori privat dhe diaspora.
“Krejt çka na ka mbetë me bërë është të dielën me dalë dhe me votu, dhe kaq. Dallimi është shumë i madh, pasi besimin qytetarët e kanë dhënë edhe më 12 tetor, pavarësisht që na ka ikur për atë 2.12 për qind”, tha mes tjerash Gjini.
Në Gjakovë AAK është në koalicion me PDK – në dhe LDK – në, ndërsa kundërkandidat ka atë nga lëvizja Vetëvendosje.
