Njësitet speciale të Policisë së Kosovës e KFOR-i janë bërë bashkë në një ushtrim që është zhvilluar sot në veri të vendit.
Qëllimi i ushtrimit “ALAMO”, sipas policisë ishte koordinimi, komunikimi dhe bashkëpunimi mes njësive policore dhe KFOR-it, për të siguruar një reagim të shpejtë dhe profesional ndaj çdo situate, ku kërkohet ofrimi i një ambienti të sigurt.
“Pjesëmarrës të këtij ushtrimi nga Policia ishin njësitet relevante (speciale) të Policisë. Në këtë ushtrim është testuar koha e reagimit, pajisjet dhe komunikimi. Janë zbatuar taktika të reagimit me njësitet relevante policore. Ushtrimi ka përfunduar me sukses rreth orës 11:30”, ka bërë të ditur policia përmes një njoftimi për medie.
Policia thotë se bashkë me KFOR-in mbeten të përkushtuar e të angazhuar në ruajtjen e sigurisë për gjithë qytetarët e vendit.
