Ushtria amerikane kreu një sulm të ri ndaj një anijeje në Karaibe, në të cilin u vranë tre persona, konfirmoi Sekretari i Mbrojtjes Pete Hegseth. Ky është sulmi i fundit në një seri sulmesh vdekjeprurëse si pjesë e fushatës së administratës Trump kundër trafikimit të drogës, shkruan CNN .
“Sot, me urdhër të Presidentit Trump, Departamenti i Mbrojtjes kreu një sulm vdekjeprurës kundër një anijeje të operuar nga një organizatë e konsideruar nga autoritetet amerikane si një organizatë terroriste”, tha Hegseth në një postim në rrjetin social X. “Anija po kontrabandonte narkotikë në Karaibe dhe u godit në ujëra ndërkombëtare”. Hegseth shtoi se forcat amerikane nuk pësuan humbje në sulm.
Lufta kundër karteleve
Incidenti është pjesë e një fushate më të gjerë që Uashingtoni thotë se synon të ndalojë rrjedhën e drogës në Shtetet e Bashkuara. Në 17 sulmet deri më tani, ushtria amerikane ka vrarë gjithsej 70 persona dhe ka shkatërruar 18 anije. Vetëm tre të mbijetuar u regjistruan – dy u ndaluan për pak kohë nga Marina Amerikane përpara se të ktheheshin në vendet e tyre të origjinës, ndërsa i treti u supozua i vdekur pas një kërkimi nga Marina Meksikane.
Bazë ligjore e dyshimtë
Administrata Trump ka informuar Kongresin se SHBA-të kanë qenë në një “konflikt të armatosur” kundër karteleve të drogës që nga 2 shtatori dhe i cakton personat e vrarë si “luftëtarë armiq”. Duke vepruar kështu, administrata pretendon se ka autoritetin për të kryer sulme vdekjeprurëse pa mbikëqyrje gjyqësore, duke cituar një urdhër sekret nga Departamenti i Drejtësisë.
Megjithatë, disa anëtarë të Kongresit dhe organizata të të drejtave të njeriut e kundërshtojnë një bazë të tillë ligjore. Ata argumentojnë se trafikantët e dyshuar të drogës duhet të ndiqen penalisht, siç ishte praktika përpara se Donald Trump të merrte detyrën. Kontradikta të mëtejshme krijohen nga fakti se administrata deri më tani nuk ka ofruar publikisht prova për praninë e narkotikëve në anijet e prekura ose për lidhjen e tyre me kartelet.
