Nga një aksident trafiku në Vrellë të Istogut mbrëmë mbetën të lënduar nëntë persona.
Aksidenti sipas policisë, dyshohet se ka ndodhur pasi drejtuesi i automjetit i cili lëvizte nga Vrella në drejtim të Istogut, duke mos ju përshtatur kushteve të rrugës ka kaluar në anën e kundërt.
Spitali i përgjithshëm në Pejë, ka njoftuar se rreth orës 23:00 janë pranuar nëntë persona me lëndime dhe pas ekzaminimeve mjekësore, dy pacientë janë transferuar në Qendrën Klinike Universitare të Kosovës, njëri prej tyre në gjendje të rëndë.
Dy të tjerë janë duke u trajtuar në Spitalin e Përgjithshëm në Pejë. Pesë të tjerë pas trajtimit, janë liruar për në shtëpi.
Dafina Basholli, mjeke kujdestare, specialiste e mjekësisë emergjente në një përgjigje me shkrim për RTK-në tha se njëri nga pacientët është pranuar në mjekim intensiv qendror pas trajtimit në klinikën emergjente, ndërsa tjetri në kirurgjinë torakale. Ajo shtoi se në mjekim intensive qendror, pacienti vazhdon të jetë në gjendje stabile.
