Kryeministri në detyrë, Albin Kurti, ka bërë të ditur se të shtunën është bërë përurimi i dronëve të prodhuar në Kosovë.
I pari i ekzekutivit ka vizituar sot kompanitë e prodhimit të dronëve në Gjilan, duke theksuar se vendi po avancon në industrinë e mbrojtjes dhe po bëhet vend prodhues.
“Të ardhmen e industrisë së mbrojtjes dhe avancimit të dronëve luftarakë po e ndërtojmë e zhvillojmë edhe në Kosovë. Shteti ynë po shndërrohet në vend që prodhon. Në Gjilan, bashkë me kryetarin Hyseni, vizituam kompanitë e prodhimit të dronëve ushtarak ‘Skifteri’ dhe dronët civil nga ‘Future Minds Academy’ dhe MIGA SkyShield MAR”, ka shkruar Kurti në Facebook.
Kryeministri Kurti ka theksuar se Kosova ka investuar më herët në blerjen e dronëve nga shtetet mike dhe partnere, si Bayraktar TB-2, Puma dhe së fundmi dronët kamikaz Skydagger, ndërsa tani po zhvillon edhe prodhimin vendor të dronëve luftarakë.
“’Made in Gjilan’ përveçse natyrisht ‘Made in Kosova’. Droni kamikaz “K1”, arrin shpejtësi maksimale prej 180km/h e lartësi deri në 2500 metra. Ndërsa ‘Skifteri’ arrin në 5000 metra lartësi, hapësirë operuese 20km dhe shpejtësi prej 270km/h”, ka shtuar tutje Kurti.
Ai ka thënë se si qeveri, edhe në nivel qendror edhe lokal, do të mbështesin dhe përkrahin ngritjen e kapaciteteve dhe prodhimtarisë, gjersa ka thënë se nuk do të ndalen investimet për mbrojtje e siguri.
