Gjatë kësaj fushate për balotazh, kandidatëve u kane munguar vetëm hapja e tenderave për Like-t, duke marrë parasysh përdorimin e jashtëzakonshëm të internetit për prezantimin e fushatës se tyre. Pavarësisht apetiteve të kandidatëve, qytetarët e Kosovës kanë dhënë një verdikt të bazuar në rezultatet e secilit kandidat, të cilët gjatë mandatit katërvjeçar kane reflektuar pozitivisht. Dhe kjo është diçka që nuk kërkon koment.
Nga 38 komunat e Kosovës, 21 kanë përfunduar garën për kryetarë në raundin e parë të zgjedhjeve lokale të mbajtura më 12 tetor, ndërsa 17 të tjera do të shkojnë në balotazh më 9 nëntor. Në këto zgjedhje, ka pasur edhe një shkallë të lartë të vetëdijes së votuesve, duke u shprehur përmes zgjedhjeve të suksesshme në ato komuna ku kandidatë të ndryshëm kanë fituar në raundin e parë, përjashto kumtimet në komunat veriore me shumicë serbe.
Realisht, shumica e kandidatëve janë marrë me çështje që nuk janë kryesisht të rëndësisë së menjëhershme për qytetet, ose që ndërlidhen më shumë me administratën lokale. Politikat lokale janë të rëndësishme, por kryesisht janë fokusuar në çështje “të mërzitshme” si infrastrukturën rrugore ose shkolla, duke lënë anash cilësinë e shërbimeve shëndetësore, ujit të pijshëm nga gypat e vjetërsuar, kanalizimet me tubacione azbesti, ose zonat e gjelbëruara dhe elemente të mirëmbajtjes së ndërtesave.
Disa komuna kanë bërë përparime në përmirësimin e cilësisë së jetës së banorëve, por problemi mbetet i qenësishëm. Ato qytete janë ende larg të qenit “qytete të shëndetshme”, duke u ndikuar nga faktorë si cilësia e ajrit, disponueshmëria e zonave të gjelbra, niveli i zhurmës, numri i palestrave dhe shërbimeve për rehati si spa-t, si dhe lehtësitë për këmbësorët. Ambientet natyrore dhe hapësirat e gjelbra po shndërrohen ne ndërtime masive, ku interesat klanore vazhdojnë të ndikojnë polarizimin urban dhe planifikimin zhvillimor.
Shumica e qyteteve tona kanë pak hapësira urbane që kombinohen mirë me natyrën, ku banorët mund të gjejnë një ekuilibër midis punës, rekreacionit dhe pushimit. Zhvillimi urban nuk ka ndjekur gjithmonë kujdesin për mjedisin, dhe kjo duket më së shumti në mungesën e një plani afatgjatë për përmirësimin e cilësisë së jetës.
Ashtu si në zgjedhjet e mëparshme, nuk pati diskutime të thelluara rreth çështjeve konkrete, veçanërisht për ekonominë vendore. Megjithatë, gënjeshtrat që herë pas here shfaqeshin me stil më shumë se me përmbajtje, kanë filluar të zbehen. Është e rëndësishme të theksohet se shumica e qytetarëve nuk ranë pre e dezinformatave të përhapura në ekranet televizive ose në rrjetet sociale, të cilat shpesh janë laboratorë për psikopatët dixhitalë. Besojmë se ne balotazh qytetaret do te japin verdiktin për ata qe vërtet janë kreativ dhe qe kane dëshmuar me rezultatet e tyre pavarësisht pozicioneve te mbajtura dhe ngjyrimeve politike./kosovatimes
