Kryetari i Kuvendit të Kosovës, Dimal Basha, u ka bërë thirrje qytetarëve të marrin pjesë në zgjedhje.
Ai tha se në 18 komuna anembanë Republikës sonë sot votohet për raundin e dytë të zgjedhjeve lokale, ku përcaktohet drejtimi për katër vitet e ardhshme në nivelin e qeverisjes lokale.
“Vota është mjeti më i fuqishëm për të ndërtuar institucione përfaqësuese, për llogaridhënie si parakusht i qeverisjes së përgjegjshme dhe për t’i dhënë orientim politikave në funksion të krijimit të kushteve më të mira të jetesës për të gjithë qytetarët pa dallim. Në këtë ditë të rëndësishme, u bëj thirrje të gjithë qytetarëve me të drejtë vote në 18 komunat ku sot mbahen zgjedhjet, ta shfrytëzojnë të drejtën e tyre demokratike dhe të marrin pjesë në zgjedhje. Secila votë ka peshë dhe pjesëmarrja e lartë e forcon legjitimitetin dhe demokracinë në Republikën e Kosovës. Vendi ynë e ka kaluar testin e demokracisë tash e disa herë, prandaj edhe sot është një moment tjetër ku do të dëshmojmë kulturën tonë të lartë politike e demokratike, përmes një procesi të qetë, të lirë, të drejtë dhe me pjesëmarrje sa më të gjerë të qytetarëve”, shkroi Basha në ‘Facebook’.
