Kandidati i Lëvizjes Vetëvendosje për kryetar të Prishtinës, Hajrullah Çeku, ka ushtruar të drejtën e tij të votës në Fakultetin Filologjik në Prishtinë.Pas votimit, Çeku ka uruar që dita e zgjedhjeve të jetë e qetë dhe e suksesshme për të gjithë qytetarët.
“Pas një procesi të gjatë, sot po e përmbyllim këtë cikël të zgjedhjeve lokale me votën që është detyrim dhe angazhim ynë për ta ushtruar të drejtën tonë për qytetin. Uroj që gjithçka të shkojë në rregull, të jetë një ditë e mbarë për demokracinë, për vendin tonë dhe për kryeqytetin tonë,” tha Çeku.
Ai gjithashtu shprehu dëshirën që katërvjeçari i ardhshëm të jetë i suksesshëm për të gjithë qytetarët e Prishtinës.
“I ftoj të gjithë qytetarët që sa më masovisht ta ushtrojnë votën e tyre. Sido që të jetë rezultati uroj që gjithçka e mirë t’i pres qytetarët e Prishtinës në mandatin e ardhshëm të qeverisjes” përfundoi Çeku.
