Kryetari i Komisionit Qendror të Zgjedhjeve, Kreshnik Radoniqi ka votuar në shkollën fillore “Lidhja e Prizrenit”, në Pejë dhe pas votimit ka bërë thirrje qytetarëve që të votojnë. Ai po ashtu bëri thirrje që të respektohen rregullat dhe ligjet në mënyrë që procesi i votimit të shkojë mirë dhe i qetë.
Kryetari i KQZ-së ka thënë se çdo gjë është gati për të votuar sot. Ai ka ftuar qytetarët e 18 komunave të cilat janë në balotazh që të shfrytëzojnë të drejtën e tyre për votim.
“Bëjë apel që të respektohen rregullat dhe ligji i KQZ-së dhe rendi. Dua të ftojë edhe anëtarët e vendvotimeve që të respektojnë rregullat dhe gjithë procesi të shkojë pa asnjë problem. Uroj që të kemi një ditë të mirë dhe të qetë”, tha Radoniqi.
Kryetari i Komisionit Qendror të Zgjedhjeve (KQZ), Kreshnik Radoniqi, ka folur edhe për çështjen e votimit me asistencë, duke theksuar se institucioni që ai udhëheq ka ndërmarrë të gjitha masat e nevojshme për mbarëvajtjen e këtij procesi.
“Sa i përket votimit me asistencë, KQZ-ja ka ndërmarrë të gjitha hapat dhe procedurat përkatëse. Në manualin e trajnimeve është theksuar qartë se çka ndodh në realitet gjatë ditës së zgjedhjeve në vendvotime. Zbatimi i këtyre rregullave mbetet nën administrimin e KKZ-së,” tha Radoniqi.
Ai shtoi se në disa vendvotime votimi me asistencë ka qenë i theksuar dhe se në raste të caktuara arsyetimet në librat e votimit nuk kanë qenë të duhura, gjë që ka ngritur shqetësim brenda KQZ-së.
“Shpresoj që sot këshillat e vendvotimit do të kenë kujdes. Natyrisht, jo secili ka të drejtë të votojë me asistencë,” u shpreh më tej Radoniqi.
