Milan Vukashinoviq nga Leposaviqi, i cili u plagos rëndë më 1 nëntor afër fshatit Jelakcë në Kosovë, në rrethana ende të paqarta, ndodhet në gjendje të rëndë, kanë bërë të ditur burime nga Qendra Klinike Universitare e Nishit për gazetën serbe Danas.
“Pacientit iu hoq një veshkë, nëpër të cilën kishte kaluar plumbi, dhe iu drenua kraharori, gjë që përbënte kërcënim të menjëhershëm për jetën e tij. Ai u intubua dhe tani është i ekstubuar (pra, i hequr nga aparati i frymëmarrjes) dhe i vetëdijshëm. Plumbi i dytë, që ndodhet në shtyllën kurrizore, ende nuk është hequr”, kan thënë burimet e spitalit, shkruan Danas.
Sipas tyre, Vukashinoviq po trajtohet në kujdesin intensiv të Klinikës për Anestezi, Reanimacion dhe Terapi Intensive.
Ndërkohë, Qendra Klinike e Nishit, Ministria e Punëve të Brendshme dhe Prokuroria nuk kanë dhënë asnjë informacion zyrtar për dhjetë ditë rresht lidhur me këtë rast.
Një përjashtim ishte një lajm i publikuar më 7 nëntor në disa media proqeveritare, sipas të cilave Vukashinoviq, i lidhur me raste të spiunazhit nga Agjencia e Sigurisë dhe e Inteligjencës (BIA), u plagos gjatë një përpjekjeje për t’u arratisur në momentin e arrestimit.
Avokati i familjes Vukashinoviq, Ivan Niniq, ka deklaruar se Vukashinoqivq “është qëlluar nga një plumb serb, nga prapa”, ndërsa policia e Kosovës ka njoftuar më 3 nëntor se kishte marrë informacione se ai “ishte plagosur dhe rrëmbyer nga Xhandarmëria Serbe brenda territorit të Kosovës”.
Niniq, i cili ishte i pari që informoi publikun për rastin më 3 nëntor, vlerëson se institucionet kompetente po heshtin me qëllim, “duke pritur të shohin nëse Vukashinoviq do të mbijetojë në spitalin e Nishit, pasi versioni zyrtar i ngjarjes do të varet nga fakti nëse ai do të ‘flasë’ apo jo”.
Sipas të dhënave që ka Ninië, “persona të veshur me uniforma ushtarake, me kapuçë dhe me xhipa pa targa” dyshohet se kanë marrë pjesë në plagosjen dhe rrëmbimin e Vukashinoviq-it.
Ai shtoi se “ka shumë të ngjarë që Milani të jetë plagosur nga një snajperist i Ushtrisë Serbe”, duke shprehur dyshime edhe për versionin e Policisë së Kosovës në lidhje me përfshirjen e Xhandarmërisë.
Megjithatë, në rrjetet sociale ai ka ngritur pyetjen nëse, “përveç anëtarëve të Forcave të Armatosura Serbe, ka marrë pjesë ndokush tjetër në këtë ngjarje dhe në veprimet që pasuan më pas”.
Familja e Vukashinoviq-it ka deklaruar se më 1 nëntor ai kishte shkuar pranë vijës kufitare për të marrë një mik të tij, një anëtar aktiv i ushtrisë serbe
Një javë pas plagosjes, disa media proqeveritare publikuan lajme të ngjashme, sipas të cilave anëtarë të BIA-s, në bashkëpunim me autoritete të tjera shtetërore, kishin arrestuar dy persona nga strukturat e sigurisë në zonën e Rashkës për dyshime spiunazhi, si vazhdim i “aksionit të 1 nëntorit, kur u arrestua Milan Vukashinoviq”.
Sipas deklaratave të BIA-s, Vukashinoviq dyshohet se kishte tentuar të arratisej gjatë arrestimit, prandaj forcat e sigurisë kishin përdorur armë zjarri, duke e plagosur.
“Ai mori ndihmën e parë mjekësore në vendngjarje, u transportua në Qendrën Klinike Universitare të Nishit për trajtim dhe më pas u vendos në paraburgim”, thuhej në njoftim.
BIA shtoi gjithashtu se të arrestuarit dyshohen se “për një periudhë të gjatë kohore kanë mbledhur informacione konfidenciale me rëndësi për sigurinë e Republikës së Serbisë dhe i kanë përcjellë ato shërbimeve të inteligjencës shqiptare”.
Ndërkohë, mediat proqeveritare kanë vënë shpesh në shënjestër Vukashinoviq-in për shkak të konflikteve të tij me Listën Serbe dhe me Milan Radoiçiqin.
