Policia e Kosovës ka arrestuar tre persona të dyshuar për veprën penale “Grabitje”, e cila ka ndodhur në orët e hershme të mëngjesit të 10 nëntorit në rrugën “Tahir Zemaj” në Pejë.
Sipas njoftimit të Drejtorisë Rajonale të Policisë në Pejë, rreth orës 03:40 policia është informuar për një rast grabitjeje. Viktima ka deklaruar se është sulmuar fizikisht dhe nën kërcënimin e një mjeti të mprehtë (thikë) i janë marrë 20 euro.
Pas grabitjes, viktima është futur me dhunë në veturën e tij, të cilën njëri nga të dyshuarit e ka drejtuar në drejtim të Deçanit. Gjatë lëvizjes, vetura ka dalë nga kontrolli dhe është aksidentuar.
Pas një pune intensive hetimore, njësitë e Stacionit Policor në Pejë kanë arritur të identifikojnë dhe arrestojnë tre personat e dyshuar. Gjatë kontrollit, policia ka gjetur dhe sekuestruar 20 euro, një thikë, tre telefona mobilë dhe dy vetura që dyshohet se janë përdorur në rast.
Me urdhër të Prokurorit të Shtetit, të dyshuarit janë ndaluar për 48 orë për procedura të mëtejshme hetimore.
