Bashkimi Evropian në Kosovë ka vlerësuar gazetarin e Radio Televizionit të Kosovës (RTK), Shkumbin Osmanaj, për pjesëmarrjen e tij në programin e financuar nga BE-ja “Innovation. Media. Minds.”, që zbatohet nga Goethe-Institut dhe DW Akademie.
Në njoftimin e publikuar nga Zyra e BE-së thuhet se “ndonjëherë gazetaria shkon përtej raportimit – ajo lidh njerëzit”. Gjatë qëndrimit të tij në Korporatën e Transmetimeve të Qipros (CyBC), Osmanaj “zbuloi se si rrëfimi i historive mund të ndërtojë ura mes kulturave, mirëkuptimit dhe empatisë”.
Në rrëfimin e tij, Shkumbin Osmanaj tregon se përvoja trejavore në CyBC ka qenë më shumë se një shkëmbim profesional, te cilun e quan“një udhëtim i të nxënit dhe rizbulimit”. Ai thekson se ka pasur mundësinë të ndajë përvojat e RTK-së në fushën digjitale me kolegët nga Qiproja, duke punuar së bashku në mënyra të reja të tregimit vizual dhe përmbajtjes në rrjete sociale.
“Pashë si kureshtja shndërrohej në kreativitet, ndërsa këto metoda filluan të bëheshin pjesë e punës së tyre të përditshme,” shkruan ai.
Osmanaj shton se Qiproja i kujtoi se gazetaria është “një urë – jo vetëm mes kulturave, por edhe mes mirëkuptimit dhe empatisë”, duke theksuar rëndësinë e dëgjimit dhe kuptimit në punën mediale.
Ai thekson se kjo përvojë i ka dhënë njohuri të reja, miqësi dhe frymëzim, duke e forcuar bindjen se “media, në formën e saj më të mirë, lidh njerëzit, kulturat dhe idetë në mënyra që fjalët shpesh nuk mund t’i shprehin.”
I financuar nga Bashkimi Evropian, programi Innovation. Media. Minds: Mbështetje për Gazetarinë e Shërbimit Publik në Ballkanin Perëndimor menaxhohet nga Goethe-Institut në emër të Komisionit Evropian, në bashkëpunim me partnerin zbatues DW Akademie.
