Guvernatori i Bankës Qendrore të Republikës së Kosovës (BQK), Ahmet Ismaili, mori pjesë si folës në konferencën ndërkombëtare për nder të 100-vjetorit të Bankës së Shqipërisë, me temë: “’Një shekull banking qendror: Nga themelimi institucional te roli si ankorë rajonale”, organizuar nga Banka e Shqipërisë.
Konferenca trajtoi zhvillimet më të fundit në ekonominë globale, strategjitë e Evropës dhe sfidat e ardhshme, politikat monetare dhe rolin e bankave qendrore në kushtet e ndryshimeve të shpejta ekonomike e teknologjike, si dhe çështjet që lidhen me monedhat digjitale të qëndrueshme, pavarësinë monetare dhe të ardhmen e parasë.
Guvernatori Ismaili mori pjesë si folës në panelin me temë “Monedhat digjitale të qëndrueshme, pavarësia dhe e ardhmja e parasë”, nën moderimin e znj. Natasha Ahmetaj, Zëvendësguvernatore e Bankës së Shqipërisë. Në fillim të fjalës së tij, Guvernatori Ismaili uroi Bankën e Shqipërisë për 100-vjetorin e themelimit, duke e vlerësuar këtë përvjetor si një moment historik jo vetëm për institucionin, por edhe për sistemin financiar të rajonit në tërësi. Ai falënderoi Bankën e Shqipërisë për bashkëpunimin e ngushtë dhe të qëndrueshëm me Bankën Qendrore të Republikës së Kosovës, bashkëpunim që është konkretizuar në shkëmbimin e përvojave profesionale, zhvillimin e kapaciteteve të stafit dhe asistencën teknike në fusha me rëndësi strategjike për stabilitetin dhe zhvillimin e sistemit financiar.
Në fjalën e tij, Guvernatori Ismaili theksoi se evolucioni digjital po transformon mënyrën se si funksionojnë ekonomitë dhe shërbimet financiare, duke ndikuar drejtpërdrejt në përfshirjen financiare, efikasitetin e pagesave, forcimin e stabilitetit financiar dhe ruajtjen e integritetit monetar. Ai nënvizoi rëndësinë e drejtimit të këtij revolucioni digjital dhe theksoi se rasti i Kosovës, me një popullatë të re, shtrirjen më të gjerë të internetit në rajon dhe një infrastrukturë të përshtatshme teknologjike ka potencial të madh për zhvillimin e shërbimeve financiare digjitale.
Guvernatori ndau reformat e ndërmarra nga Kosova në digjitalizimin e infrastrukturës së pagesave, zgjerimin e qasjes në financa, zbatimin e suksesshëm të llogarisë bazike, si dhe nismat tjera strategjike, siç është përfshirja e institucioneve jobankare si pjesëmarrëse në sistemin kombëtar të pagesave. Përafrimi me SEPA, zbatimi i projektit të pagesave të shpejta (TIPS Clone), standardizimi i QR Code-ve, si dhe zhvillime të tjera në pajtim me planin strategjik të BQK-së u pasqyruan më tej. Ai theksoi rëndësinë e edukimit financiar, forcimit të kapaciteteve të brendshme, zgjerimit të infrastrukturës dhe menaxhimit të rreziqeve që burojnë nga digjitalizimi, sovranitetit monetar, stabilitetit financiar dhe sigurisë kibernetike.
Në vijim, Guvernatori Ismaili foli për kuadrin e ri rregullativ për gatishmërinë dhe qëndrueshmërinë operacionale, mbikëqyrjen e sistemeve dhe sigurinë kibernetike si dhe kontraktimin e shërbimeve ndaj palëve të treta, si pjesë e avancimit të rregullativës ndaj sektorit financiar, krahas fuqizimit të kapaciteteve të brendshme dhe funksionalizimit të njësive të reja organizative të fokusuara në mbikëqyrjen ndaj institucioneve financiare.
Lidhur me kriptoasetet, ai sqaroi se BQK po ndjek një qasje graduale dhe të kujdesshme, në përputhje me standardet ndërkombëtare dhe në bashkëpunim të ngushtë me Fondin Monetar Ndërkombëtar (FMN). Sa i përket monedhës digjitale të bankës qendrore (CBDC), Guvernatori theksoi se BQK po ndjek me vëmendje zhvillimet e Bankës Qendrore Evropiane për Euron Digjitale, me synimin për t’u përfshirë në fazat e mëvonshme, duke analizuar ndikimet potenciale në tregun financiar, sjelljen e qytetarëve dhe strukturën e sistemit të pagesave.
Në përmbyllje të fjalës, Guvernatori Ismaili theksoi se inovacioni financiar duhet të ecë paralelisht me stabilitetin, transparencën dhe edukimin financiar të qytetarëve, në mënyrë që transformimi digjital të përkthehet në përfshirje më të gjerë dhe mirëqenie ekonomike për të gjithë. Megjithatë, stabiliteti financiar, sovraniteti monetar, integriteti i sistemit financiar, mbrojtja e konsumatorit dhe e të dhënave personale, krahas rreziqeve kibernetike, mbeten boshti mbi të cilin ndërtohen politikat tona.
Punimet e konferencës u hapën me fjalët përshëndetëse të Guvernatorit të Bankës së Shqipërisë, z. Gent Sejko, dhe Kryeministrit të Republikës së Shqipërisë, si dhe me video mesazhe të posaçme nga Presidentja e Bankës Qendrore Evropiane (BQE), dhe Drejtorja Menaxhuese e Fondit Monetar Ndërkombëtar (FMN). Kjo konferencë ndërkombëtare e nivelit të lartë mblodhi së bashku guvernatorë të bankave qendrore, përfaqësues të institucioneve financiare ndërkombëtare dhe ekspertë të njohur të fushës.
