Pas dorëheqjes së Memli Krasniqit nga posti i kryetarit të Partisë Demokratike të Kosovës, ka reaguar zyrtari i lartë i kësaj partie, Bedri Hamza, i cili ka shprehur mirënjohje për punën dhe përkushtimin e tij gjatë udhëheqjes së PDK-së.
“Nuk gjej fjalë për ta falënderuar mikun tim, Memli Krasniqin, për kontributin e madh që ka dhënë në udhëheqjen e PDK-së. Me integritet, vendosmëri dhe përkushtim ndaj vlerave të përbashkëta, ai e drejtoi partinë në periudhat më të vështira. Respekt dhe mirënjohje për bashkëpunimin korrekt dhe për gjithçka që ke bërë për PDK-në, miku im!”, ka shkruar Hamza.
Ai ka theksuar se pas këtij zhvillimi, është më e rëndësishme se kurrë që PDK-ja të qëndrojë e bashkuar dhe e përkushtuar ndaj qëllimeve të saj.
“Sot, më shumë se kurrë, ne kemi nevojë të qëndrojmë të bashkuar, të përkushtuar dhe të vendosur përballë sfidave që na presin. Bashkimi, besimi dhe përkushtimi ynë i përbashkët janë forca më e madhe e PDK-së dhe garancia e suksesit tonë,” ka shtuar Hamza.
Pas dorëheqjes së Krasniqit, emri i Bedri Hamzës po përmendet si një ndër kandidatët e mundshëm për kryetar të ardhshëm të Partisë Demokratike të Kosovës.
