Toka mund të goditet nga një stuhi e fuqishme diellore sonte, e cila, përveç shfaqjes spektakolare të Aurora Borealis në pjesë të Evropës, mund të shkaktojë edhe ndërprerje serioze në sistemet GPS, komunikimet dhe rrjetet e energjisë.
Shërbimi Gjeologjik Britanik (BGS) e ka rritur parashikimin e aktivitetit në nivelin më të lartë dhe paralajmëroi se një stuhi që tashmë ka goditur Tokën ka shkaktuar ndërprerje në komunikime dhe navigacion satelitor. Sipas të dhënave të tyre, një stuhi e dytë gjeomagnetike ‘kanibale’, e cila po ushqehet fjalë për fjalë nga e para, mund të arrijë në Mbretërinë e Bashkuar gjatë pasdites dhe të jetë një nga më të fortat në njëzet vitet e fundit, shkruan Sky News .
Stuhite dellore ndodhin kur Dielli nxjerr sasi të mëdha grimcash dhe energjie në hapësirë. NASA paralajmëron se shpërthime të tilla mund ta prishin seriozisht fushën magnetike të Tokës. Stuhia e fundit ka krijuar tashmë fushën më të fortë gjeoelektrike të regjistruar ndonjëherë nga BGS. Shfaqje spektakolare të aurorave u panë në disa pjesë të Mbretërisë së Bashkuar mbrëmë, dhe një spektakël i ngjashëm pritet sonte, nëse e lejon moti.
Ngjyrat e aurorës krijohen kur grimcat e ngarkuara nga Dielli godasin atomet dhe molekulat në shtresat e sipërme të atmosferës së Tokës. Stuhi të tilla mund të arrijnë planetin tonë në vetëm 17 orë, megjithëse ndonjëherë zgjasin shumë më tepër. Sipas BGS, stuhia aktuale mund të arrijë intensitetin e saj më të lartë, nivelin G5, që do të thotë mundësinë e ndërprerjeve të energjisë elektrike, ndërhyrjeve afatgjata me GPS dhe problemeve me orientimin e anijeve kozmike.
NASA thotë se stuhitë diellore nuk përbëjnë një kërcënim të drejtpërdrejtë për njerëzit, sepse ne jemi të mbrojtur nga atmosfera dhe fusha magnetike e Tokës.
