Ka përfunduar procesi i numërimit dhe verifikimit të votave në Qendrën Komunale të Numërimit në Mitrovicën e Jugut.Anëtari i Komisionit Qendror të Zgjedhjeve (KQZ) nga radhët e Partisë Demokratike të Kosovës (PDK), Ilir Gashi, ka deklaruar se gjatë këtij procesi janë evidentuar parregullsi serioze në fletëvotime, të cilat, sipas tij, kanë cenuar besimin e opinionit publik në integritetin e zgjedhjeve.
“Siç e dini, sot përfundoi procesi i verifikimit dhe numërimit të votave në këtë qendër. I falënderoj të gjithë vëzhguesit dhe numëruesit për punën e mirë dhe për identifikimin e çdo fletëvotimi. Megjithatë, gjatë procesit kemi vërejtur defekte serioze në disa prej tyre, që në një mënyrë apo tjetër kanë rrënuar besimin e qytetarëve në procesin zgjedhor,” tha Gashi.
Sipas tij, mënyra e vetme për ta rikthyer besimin dhe integritetin e procesit është zhvillimi i zgjedhjeve të reja në Komunën e Mitrovicës së Jugut.
“Ne konsiderojmë se e vetmja mënyrë për ta kthyer këtë proces në binarë dhe për t’i dhënë besueshmëri është që qytetarët e Mitrovicës së Jugut të ftohen sërish në votim. Opinioni publik tashmë mendon se ky proces është dëmtuar thellësisht,” shtoi ai.
Gashi bëri të ditur se në shumë vendvotime janë konstatuar defekte në fletëvotime, që bien ndesh me rregulloret e KQZ-së. Sipas tij, PDK do të kërkojë analizë hetimor për të verifikuar origjinalitetin e tyre.
“PDK ka dorëzuar ankesë në Panelin Zgjedhor për Ankesa dhe Parashtresa (PZAP) dhe do t’i ndjekë të gjitha rrugët ligjore,” përfundoi Gashi.
Ndërsa Sami Kurteshi, anëtar i VV-së në KQZ ka thënë se nuk ka asnjë informatë rreth numrit të fletëvotimeve me mospërputhje të numrave serik dhe nuk ka çfarë të deklarojë.
Bajram Hajdari, kryesues i Komisionit Komunal Zgjedhor, tha se procesi i verifikimit të fletëvotimeve ka përfunduar në orën 14:00.
“Tash jemi duke bërë përgatitjet për bartjen e materialit në QNR, në Fushë Kosovë. Sipas një verifikimi paraprak, janë 75 fletëvotime për të cilat po flisni ju. Këto fletëvotime i takojnë të dy kandidatëve. Me kërkesë të policisë, i kemi bërë kopje dhe i kemi dorëzuar. Tani janë organet tjera që merren me to,” tha ai.
Për kryetar të Mitrovicës në garë ishin Faton Peci i Lëvizjes Vetëvendosje dhe Arian Tahiri i PDK-së. Sipas rezultateve preliminare, fitues doli Peci me 2 mijë e 315 vota më shumë.
