Gjykata Supreme e ka pranuar si të bazuar ankesën e kandidatit të AAK-së për Kuvendin Komunal në Istog, Avni Gashi, i cili në Supreme u ankua kundër vendimit të PZAP-së, duke ia kthyer çështjen këtij paneli në rivendosje.
“Gjykata Supreme vlerëson se në rastin konkret, PZAP ka vendosur refuzimin e ankesës së parashtruar nga kandidati për Kuvend Komunal, por nuk ka dhënë arsye të qëndrueshme dhe bindëse në raport me pretendimet ankimore”, thuhet në vendimin e Supremes.
Për pasojë, Gjykata Supreme vlerëson se rinumërimi i votave në vendvotimet e identifikuara në ankesë është i domosdoshëm për të vërtetuar rezultatin e saktë të zgjedhjeve dhe për të garantuar integritetin e procesit zgjedhor, në përputhje me parimin e besueshmërisë së zgjedhjeve të sanksionuar në nenin 45 të Kushtetutës së Republikës së Kosovës.
“Në rivendosje, PZAP, udhëzohet që të shqyrtojë edhe njëherë pretendimet ankimore të ankuesit, provat e deponuara dhe të procedojë tutje në hetimin e këtyre pretendimeve përkatëse duke siguruar mos cenimin e integriteti të procesit zgjedhor dhe duke pamundësuar devijimin e vullnetit të qytetarëve”, thotë Supremja.
Kandidati për Kuvendin Komunal në Istog ishte ankuar në PZAP kundër vendimit të Komisionit Qendror të Zgjedhjeve për shpalljen e rezultateve përfundimtare për anëtarë të Kuvendit Komunal ndërkohë kishte kërkuar nga Gjykata Supreme që përveç t’i aprovohej si e bazuar ankesa, e të anulohet vendimi i PZAP-së, gjithashtu të obligohet KQZ-ja të bëjë verifikimin e materialit zgjedhor dhe të urdhërohet rinumërimi i votave në disa vendvotime si dhe rishikimin e votave me postë për komunën e Istogut.
