Korporata tha se montazhi kishte dhënë “përshtypjen e gabuar se Presidenti Trump kishte bërë një thirrje të drejtpërdrejtë për veprim të dhunshëm” dhe njoftoi se programi nuk do të transmetohet më.

Avokatët e Trump-it kanë kërcënuar se do të padisin BBC-në për 1 miliard dollarë (759 milionë £) për dëme, nëse korporata nuk tërheq dokumentarin, nuk kërkon falje dhe nuk e kompenson atë.

Përplasja që pasoi shkaktoi dorëheqjet e drejtorit të përgjithshëm të BBC-së, Tim Davie, dhe të kreut të lajmeve, Deborah Turness. BBC-ja ka kërkuar koment nga Shtëpia e Bardhë.

Kërkimi i faljes vjen pasi një tjetër klip, i montuar në mënyrë të ngjashme dhe transmetuar në Newsnight në vitin 2022, u zbulua nga Daily Telegraph.

Në rubrikën “Korrigjime dhe Sqarime”, të publikuar të enjten në mbrëmje, BBC-ja tha se programi Panorama ishte rishikuar pas kritikave për mënyrën se si ishte redaktuar fjalimi i Trump-it.

“Ne pranojmë se redaktimi ynë krijoi pa dashje përshtypjen se po shfaqnim një pjesë të vetme të pandërprerë të fjalimit, në vend të fragmenteve nga pika të ndryshme të tij, dhe se kjo dha përshtypjen e gabuar se Presidenti Trump kishte bërë një thirrje të drejtpërdrejtë për veprim të dhunshëm”, thuhet në deklaratë.

Një zëdhënës i BBC-së tha se avokatët e korporatës i kishin shkruar ekipit ligjor të Presidentit Trump në përgjigje të një letre të marrë të dielën.

“Kryetari i BBC-së, Samir Shah, ka dërguar veçmas një letër personale Shtëpisë së Bardhë, duke i bërë të qartë Presidentit Trump se ai dhe korporata ndjejnë keqardhje për montazhin e fjalimit të 6 janarit 2021, i cili u përfshi në program”, tha zëdhënësi.

“BBC-ja nuk ka në plan ta ritransmetojë dokumentarin Trump: A Second Chance? në asnjë nga platformat e saj. Ndërsa BBC-ja shpreh keqardhje të sinqertë për mënyrën në të cilën u redaktua klipi video, ne besojmë fuqishëm se nuk ka bazë për një kërkesë për shpifje”.

Pse Donald Trump kërcënon të padisë BBC-në?

Në fjalimin e tij më 6 janar 2021, Trump tha:

“Do të ecim drejt Kapitolit dhe do të brohorisim për senatorët dhe kongresmenët tanë të guximshëm.”

Më shumë se 50 minuta më vonë në të njëjtin fjalim, ai tha:

“Dhe ne luftojmë. Luftojmë si ferr.”

Në dokumentarin e Panorama-s të vitit 2024, klipi e tregonte duke thënë:

“Do të ecim drejt Kapitolit… dhe unë do të jem atje me ju. Dhe ne luftojmë. Luftojmë si ferr.”

Duke folur për Fox News, Trump tha se fjalimi i tij i 6 janarit 2021 ishte “masakruar” dhe se mënyra se si u paraqit “mashtronte” shikuesit.

BBC-ja mori letrën nga avokatët e Trump-it të dielën. Ajo kërkon një “tërheqje të plotë dhe të drejtë” të dokumentarit, një falje dhe që BBC-ja “të kompensojë në mënyrë të përshtatshme Presidentin Trump për dëmin e shkaktuar”. Letra caktonte një afat deri në orën 22:00 GMT (17:00 EST) të premten që korporata të përgjigjej.

Pesë argumentet ligjore të BBC-së

Në letrën e saj ligjore drejtuar ekipit të Trump-it, BBC-ja përmend pesë pika kryesore:

BBC-ja nuk kishte të drejta për të shpërndarë episodin e Panorama-s në kanalet e saj në SHBA dhe nuk e kishte bërë këtë.

Kur dokumentari ishte në dispozicion në BBC iPlayer, ai ishte i kufizuar gjeografikisht vetëm për shikuesit në Mbretërinë e Bashkuar.

Dokumentari nuk i shkaktoi dëm Trump-it, pasi ai u rizgjodh.

Klipi nuk ishte krijuar për të mashtruar, por për të shkurtuar një fjalim të gjatë, dhe redaktimi nuk ishte bërë me dashakeqësi.

Klipi nuk duhej parë në izolim, ishte vetëm 12 sekonda brenda një programi njëorësh që përfshinte edhe shumë përkrahës të Trump-it.

BBC-ja shton gjithashtu se opinioni mbi çështje me interes publik dhe fjalimet politike mbrohen fuqishëm nga ligjet për shpifje në SHBA.

Një burim i brendshëm tha se brenda BBC-së ekziston një bindje e fortë për qëndrueshmërinë e mbrojtjes së saj ligjore.

Akuzë e re për montazh mashtrues

Më herët të enjten, BBC-ja u akuzua për një tjetër montazh mashtrues të fjalimit të Trump-it të 6 janarit 2021, dy vjet para se të transmetohej sekuenca e Panorama-s.

Në një episod të Newsnight nga viti 2022, montazhi ishte disi ndryshe nga ai i Panorama-s:

Trump shihej duke thënë:

“Do të ecim drejt Kapitolit. Dhe do të brohorisim për senatorët dhe kongresmenët tanë të guximshëm. Dhe ne luftojmë. Luftojmë si ferr. Dhe nëse nuk luftojmë si ferr, nuk do të kemi më një vend.”

Pas kësaj, dëgjohej zëri i prezantueses Kirsty Wark që thoshte “dhe ata luftuan”, ndërsa në ekran shfaqeshin pamje nga trazirat në Kapitol.

Duke reaguar në të njëjtin program, ish-shefi i stafit të Shtëpisë së Bardhë, Mick Mulvaney — i cili dha dorëheqjen nga një post diplomatik dhe më vonë u bë kritik i Trump-it pasi i quajti trazirat e 6 janarit një “përpjekje për grusht shteti” — tha se videoja kishte “bashkuar” pjesë të ndryshme të fjalimit.

“Ajo pjesë ‘ne luftojmë dhe luftojmë si ferr’ është në fakt shumë më vonë në fjalim, dhe videoja juaj e bën të duket sikur këto dy fraza janë të lidhura,” tha ai.

Në përgjigje të artikullit të Telegraph të së enjtes, një zëdhënës i BBC-së tha se korporata “respekton standardet më të larta editoriale” dhe se çështja po hetohet.

Një zëdhënës i ekipit ligjor të Trump-it i tha Telegraph se “tani është e qartë që BBC është angazhuar në një model shpifjeje ndaj Presidentit Trump”, shkruan BBC.