Banorët e ishullit turistik Jeju të Koresë së Jugut kanë gjetur pako të pazakonta që duken si qese çaji kinez në brigjet e tyre që nga shtatori. Megjithatë, një analizë më e detajuar zbuloi se ato përmbanin ketaminë, një drogë e rrezikshme, përdorimi rekreativ i së cilës është i paligjshëm, shkruan BBC .
Sipas raporteve të policisë, në të paktën tetë raste, u gjetën rreth 28 kilogramë drogë, të mbështjellë me kujdes në fletë metalike dhe të shënuar me karakterin kinez për “çaj”. Ketamina përdoret normalisht si anestetik në mjekësi, por abuzimi me të mund të shkaktojë dëme të rënda fizike dhe mendore, duke përfshirë dëmtimin e zemrës dhe mushkërive.
Për shkak të gjetjeve alarmuese, Roja Bregdetare e Ishullit Jeju formoi një ekip të posaçëm të ngarkuar me monitorimin e rrugëve të mundshme detare dhe tokësore me anë të të cilave droga mund të kishte mbërritur në vend. Autoritetet lëshuan gjithashtu një paralajmërim për banorët që të mos preknin objekte të dyshimta, por të raportonin menjëherë në polici çdo gjetje.
Banorët janë të shqetësuar
Sekuestrimi më i madh i vetëm ndodhi më 15 tetor, kur një pastrues plazhi në bregdetin e Seogwipo gjeti 20 kilogramë drogë në “qese çaji”. Më herët këtë javë, u organizua një kontroll masiv i plazheve në qytetin Jeju, në të cilin, sipas Korea JoongAng Daily, morën pjesë më shumë se 800 ushtarë, oficerë policie dhe vullnetarë civilë.
Hetuesit tani po përqendrohen në mundësinë që droga të ketë mbërritur në brigjet e Jeja-s e transportuar nga rrymat oqeanike. Kreu i njësisë së narkotikëve të Rojës Bregdetare tha se pako të ngjashme u gjetën në Pohang, një qytet tjetër i Koresë së Jugut, dhe në ishullin japonez Tsushima.
Prania e drogës në brigje ka shkaktuar shqetësim të madh tek banorët vendas. “Shpesh i sjell fëmijët e mi në këtë plazh”, tha për Korea JoongAng Daily banorja Kim, e cila ishte dëshmitare e kërkimit masiv. “Të shohësh kaq shumë njerëz që kërkojnë drogë është e frikshme. Më dridh mendja se fëmijët mund të prekin diçka të tillë”, shtoi ajo.
Profesori: Unë besoj se kjo është një organizatë serioze kriminale.
Një banor tjetër, Hyun, u kërkoi autoriteteve të përqendrohen në “ndalimin e mbërritjes së mëtejshme të drogës”. Yoon Heung-hee, një profesor në departamentin e varësisë nga droga dhe alkooli në Universitetin Hansung, beson se një organizatë më e madhe kriminale mund të fshihet pas dërgesave të ketaminës.
Ai shpjegoi metodën “sea gunga”, të cilën disa organizata e përdorin për të transportuar narkotikë. Metoda përfshin hedhjen e pakove me drogë të pajisura me lokatorë në oqean, për t’u marrë më vonë nga dikush tjetër.
Profesori Yoon i tha gazetës lokale The Hankyoreh se grupet kriminale mund të kenë tentuar të kontrabandojnë drogë nëpër Korenë e Jugut nëpërmjet ishullit Jeju, “duke përfituar nga inspektimet e dobëta në aeroporte dhe porte”.
