Seanca ndaj Bedri Shabanit dhe Muharrem Qerimit, të akuzuar për spiunazh, u shty për datën 20 nëntor, me arsyetimin se njëri nga të akuzuarit kishte probleme shëndetësore.
Seanca gjyqësore ndaj të akuzuarve për spiunazh, Bedri Shabani dhe Muharrem Qerimit e cila ndonëse filloi me vonesë, u zhvillua me disa ndërprerje. Kjo u arsyetua me gjendjen shëndetësore të të akuzuarit Bedri Shabani, i cili një ditë më parë ishte ankuar duke kërkuar nga trupi gjykues shtyrje të seancës.
Kryetari trupit gjykues pyet Bedriun: A të kanë dërgu te doktori brenda burgut?
“Po brenda burgut, ju kisha lut që seanca mos të mbahet, nuk jam në gjendje me mbajt seance..”, u përgjigj i akuzuari.
Ndërkohë, kryetari i trupit gjykues, Rrahman Beqiri njoftoi se për shëndetin e të akuzuarit kanë kërkuar raport edhe nga burgu.
“Duke qenë se kjo përgjigje ishte pak e mangët gjykata edhe njëherë përmes telefonit kontakton me njësinë përkatëse në burg për tu interesuar se a është vizituar konkretisht sot tek mjeku apo jo dhe nga përgjigja përmes telefonit rezulton se edhe sot i akuzuari Shabani është vizitu te mjeku i burgut dhe se parametrat vital kanë qenë brenda vlerave normale”, theksoi ai.
Shabani megjithatë u pyet disa herë për gjendjen shëndetësore, për çka insistoi se nuk është në gjendje të qëndroj në sallë.
“Kam shqetësime të shumta dhe kërkoj në mënyrë humane që të shtyhet kjo seancë dhe seanca tjetër dhe në herën tjetër besoj që do jem më mirë për shkak se edhe terapia që jam tu e marr është shumë e rëndë dhe nuk mundem me përcjell seancën”, tha Shabani.
Mbrojtësi i të akuzuarit Shabani, Besnik Berisha kërkoi që derisa të qartësohet situate për shëndetin e klientit të tij, mediat të largohen nga salla, kërkesë që fillimisht u kundërshtua nga prokuroria, por që me urdhër të gjykatësit, mediat u larguan.
“Urdhërohet largimi i të gjithë personave që nuk janë të domosdoshëm për këtë procedurë…”, tha gjykatësi.
Pas diskutimit mes palëve pa prezencën e mediave u vendos që seanca e radhës të mbahet me 20 nëntor.
Prokuroria Speciale e Kosovës më 19 shkurt 2025 ngriti aktakuzë ndan ish-doganierit Bedri Shabani dhe ish-policit Muharrem Qerimi, për veprën penale spiunazh.
Sipas informacioneve të lëshuara nga Prokuroria Speciale, Shabani dhe Qerimi mblodhën informata që do t’i shërbenin Ministrisë së brendshme serbe, për ta ndërtuar një narrativ të rremë për një rrjet të trafikimit të organeve nga Ushtria Çlirimtare e Kosovës gjatë luftës.
Qerimi në bazë të aktakuzës i ka dërguar zyrtarit të Ministrisë së Brendshme, Sërgjan Rosiq edhe të dhëna të klasifikuara që lidheshin me veprimtarinë e Prokurorisë Speciale.
Ndërkohë i akuzuari Bedir Shabani, në bazë të pretendimeve të prokurorisë, përveç Rosiqit, pati kontakt edhe me një zyrtar tjetër, Bogolub Janiçeviq, që kishte rol udhëheqës në masakrën e Reçakut.
