Në emisionin e mëngjesit në RTK, ishte Lulzim Fushtica, drejtor i Drejtorisë për Siguri dhe Emergjenca në Komunën e Prishtinës, i cili foli për projektin e fundit që ka të bëjë me instalimin e kamerave të sigurisë në kryeqytet.
Fushtica tha se ky projekt është rezultat i bashkëpunimit ndërmjet Drejtorisë për Siguri dhe Emergjenca dhe Policisë së Kosovës, dhe se financimi është bërë nga komuna përmes kësaj drejtorie.
“Dy vitet e fundit kemi filluar projektin e vendosjes së sistemit të kamerave të sigurisë në kryeqytet. Ky është një projekt i përgatitur nga Policia e Kosovës në bashkëpunim me drejtorinë tonë. Financues është Drejtoria për Siguri dhe Emergjenca, dhe bashkarisht kemi bërë implementimin e tij gjatë dy viteve të fundit. Deri më tani janë vendosur 165 kamera në 54 lokacione”, tha Fushtica.
Ai shtoi se ky është vetëm faza e parë e këtij projekti, i cili do të vazhdojë edhe gjatë dy viteve të ardhshme.
“Kjo është vetëm një pjesë e vogël e një projekti shumë më të madh, që do të vazhdojë edhe në periudhën e ardhshme, me synim që të mbulohet i tërë qyteti,” theksoi ai.
Sipas komunës, vendosja e kamerave të sigurisë pritet të ndihmojë në rritjen e sigurisë publike dhe parandalimin e veprave penale në kryeqytet.
