Arsimtari Muhamed Hajredinaj është paraqitur sërish para Gjykatës Themelore, ku po akuzohet për përdhosje të simboleve kombëtare dhe nxitje të përçarjes. Ai ka mohuar të gjitha pretendimet e Prokurorisë, duke deklaruar se ngjarja është “tjetërsuar” dhe nuk ka ndodhur ashtu siç përshkruhet në aktakuzë. Në seancën e së enjtes, palët paraqitën qëndrimet e tyre, ndërsa mungesa e dëshmitarëve të ftuar e karakterizoi vazhdimin e procesit gjyqësor.
Muhamed Hajredinaj, i akuzuar për përdhosje të simboleve kombëtare, është deklaruar edhe një herë i pafajshëm para Gjykatës Themelore për akuzën se kishte hedhur flamurin kombëtar dhe plisin e një nxënëseje në mbeturina.
“Ngjarja është absolutisht diçka sikur po e dëgjoj për herë të parë. Nuk ka ndodhur mes meje dhe atyre, në mënyrën siç është paraqitur nga prokurori në aktakuzë. Është krejtësisht e tjetërsuar”, ka deklaruar ai.
Avokati i tij, Muhamed Muji, në fjalën hyrëse ka theksuar se i mbrojturi nuk ka pasur për qëllim përdhosjen e simboleve kombëtare dhe se Prokuroria nuk ka arritur të gjejë prova që e vërtetojnë këtë. Ai ka derklaruar se i mbrojturi i tij, ‘rrjedh nga një familje kombëtare’.
Sipas planifikimit të Gjykatës, në këtë seancë pritej dëgjimi i dy dëshmitarëve, F.B. dhe M.Sh., por gjyqtari Përlaska njoftoi se ata nuk janë paraqitur.
Dëshmitari F.B. kishte njoftuar përmes policisë se është në një udhëtim zyrtar, pa paraqitur provë. Ndërsa dëshmitarja M.B., edhe pse e ftuar me ftesë të rregullt, nuk e ka arsyetuar mungesën. Për këtë arsye, Gjykata i shqiptoi gjobë prej 50 euro dhe urdhëroi sjelljen e saj me detyrim në seancën e radhës nga Policia e Kosovës.
Gjykata refuzoi edhe propozimin e mbrojtjes për dëgjimin e babait të të akuzuarit, i cili, sipas mbrojtjes, do të dëshmonte për karakterin e tij.
Sipas Prokurorisë Speciale, Hajredinaj dyshohet për veprën penale “Nxitja e përçarjes dhe mosdurimit”.
Sipas aktakuzës, i pandehuri, për shkak të bindjeve të tij fetare, të cilat sipas Prokurorisë i kishte shprehur edhe më herët në prani të nxënësve, kishte marrë flamurin kuqezi dhe plisin dhe, pavarësisht kundërshtimeve të nxënësve, i kishte hedhur në shportën e mbeturinave.
Po ashtu, dyshohet se kishte larguar nga ora mësimore një nxënëse që mbante këto simbole për pjesëmarrje në programin festiv të Ditës së Flamurit. Me këto veprime, sipas Prokurorisë, ai kishte nxitur publikisht urrejtje dhe mosdurim ndërmjet grupeve kombëtare, etnike dhe fetare.
