Kryetari i degës së AAK-së në Prizren, Besnik Krasniqi, ka thënë se Aleanca për Ardhmërinë e Kosovës duhet ta shqyrtojë me përgjegjësi mundësinë e bashkëpunimit me Lëvizjen Vetëvendosje. Krasniqi, përmes një postimi në Facebook, ka theksuar se duhet të shmangen zgjedhjet e jashtëzakonshme.
Krasniqi ka vlerësuar se dalja e Glauk Konjufcës si kandidat për kryeministër ka ndryshuar llogaritë politike në vend dhe se kjo situatë kërkon një qasje serioze, të matur dhe larg interesave të ngushta partiake.
“Aleanca duhet ta shqyrtojë me përgjegjësi mundësinë e bashkëpunimit, sidomos nëse kjo hap rrugën për stabilitet institucional, shmang zgjedhjet e jashtëzakonshme dhe zgjidh njëherë e mirë çështjen e presidentit. Nëse VV dhe z. Konjufca janë të sinqertë në këtë drejtim, unë besoj se Aleanca dhe kryetari Haradinaj do të dinë të marrin vendimin e duhur, si gjithmonë kur është fjala për të mirën e Kosovës,” ka shkruar ai.
Krasniqi ka theksuar se sot kërkohet mençuri, jo retorikë boshe.
“Kërkohet stabilitet, jo tension. Kërkohet vendim, jo improvizim. Kosova ka nevojë për drejtim të qartë, dhe kjo është koha kur burrat e shtetit duhen parë në vepër,” ka shtuar ai.
Reagimi i Krasniqit vjen një ditë pasi lideri i Aleancës për Ardhmërinë e Kosovës, Ramush Haradinaj, deklaroi se kishte pasur kërkesa për komunikim me mandatarin e dytë për krijimin e qeverisë së re.
Megjithatë, ai tha se nuk ka në plan të bëjë një gjë të tillë, duke shtuar se kanë vlerësim për figurën e ish-kryetarit të Kuvendit.
Aleanca për Ardhmërinë e Kosovës dhe Lëvizja Vetëvendosje kishin marrëveshje bashkëpunimi për balotazh në Prizren, të nënshkruar nga Besnik Krasniqi dhe Artan Abrashi.
