ITALIA po shqyrton futjen e një takse të njëhershme mbi familjet për asetet e arit për t’i regjistruar ato në ekonominë zyrtare, tregoi një ndryshim në ligjin e buxhetit të vitit 2026. Tatimpaguesit që nuk kanë një llogari për shufrat e tyre të arit, bizhuteritë dhe monedhat e koleksionistëve dhe zgjedhin t’i deklarojnë ato me vlerën e tregut do të paguajnë një normë tatimore prej 12.5 përqind, me mundësinë e pagesës së taksës në tre këste.
Afati i fundit për aplikime do të jetë qershori i vitit të ardhshëm dhe procesi do të mbikëqyret nga ndërmjetës dhe këshilltarë të autorizuar, me kontrolle të rrepta mbi zbatimin e rregulloreve kundër pastrimit të parave. Aktualisht, asete të tilla të pallogaritura i nënshtrohen një shkalle tatimore prej 26 përqind, e llogaritur mbi vlerën e tyre totale të shitjes, jo vetëm mbi fitimin kapital të realizuar nga shitja e tyre.
Prandaj, qytetarët ngurrojnë të shesin arin e trashëguar në tregun zyrtar dhe kryejnë disa transaksione në mënyrë joformale ose përmes kanaleve që nuk raportojnë transaksionet, gjë që kufizon likuiditetin e tregut dhe të ardhurat tatimore, thanë përfaqësuesit e koalicionit qeverisës të partive Liga dhe Forza Italia.
Shitjet e arit u rritën
Sipas disa vlerësimeve, italianët mbajnë në duar private midis 4,500 dhe 5,000 ton ar, që vlen afërsisht 500 miliardë euro me çmimet aktuale. Rrjeti italian i dyqaneve “Compro Oro”, i cili blen dhe shet ar, ka parë një rritje të xhiros kohët e fundit, pasi çmimet e arit kanë arritur nivele rekord.
Shitjet e arit të përdorur janë rritur me afërsisht 25 për qind këtë vit, me më shumë se 1.2 milion transaksione në muaj, pasi familjet shisnin bizhuteri dhe monedha të vjetra, sipas botimit italian Metropolitan Magazine.
Mbështetësit e taksës theksojnë se ajo mund të gjenerojë të ardhura të konsiderueshme buxhetore një herëshe, ndërkohë që përmirëson gjithashtu transparencën në një treg që është karakterizuar prej kohësh nga pronësia e errët dhe transferimet familjare jashtë kanaleve zyrtare.
Nëse qytetarët deklarojnë 10 përqind të pronësisë së investimit dhe marrin një certifikatë të vlerës së tij të tregut, buxheti i shtetit mund të jetë “më i pasur” me deri në 2.08 miliardë euro shtesë, vlerëson Ministria e Financave.
Propozimi synon gjithashtu të inkurajojë “qarkullimin ligjor” të arit duke eliminuar penalitetet për qytetarët që nuk mund të paraqesin prova blerjeje nga vite apo edhe dekada më parë. Amendamenti i propozuar duhet ende të miratohet nga qeveria dhe parlamenti.
