Drejtori i Përgjithshëm i Doganës së Kosovës, Agron Llugaliu, priti sot në një takim zyrtar të Ngarkuarën me Punë të Ambasadës së Shteteve të Bashkuara të Amerikës në Kosovë, Anu Prattipati.
Sipas njoftimit të Doganës, gjatë takimit, palët diskutuan për thellimin e bashkëpunimit bilateral në fushën e lehtësimit të tregtisë, forcimin e integritetit institucional dhe avancimin e kapaciteteve profesionale përmes programeve të asistencës teknike.
Drejtori Llugaliu thuhet se prezantoi arritjet e deritanishme të Doganës së Kosovës dhe theksoi gatishmërinë për intensifikimin e bashkëpunimit me qëllim rritjen e transparencës, sigurisë dhe efikasitetit në shërbimet doganore.
“Ai shprehu mirënjohjen për mbështetjen e vazhdueshme të Shteteve të Bashkuara, duke u shprehur se partneriteti strategjik me SHBA-në mbetet kyç për forcimin e kapaciteteve doganore dhe përmirësimin e shërbimeve për qytetarët dhe komunitetin e biznesit”, thuhet në njoftim.
E ngarkuara me Punë, Prattipati, vlerësoi përpjekjet e Doganës së Kosovës në modernizim dhe theksoi se SHBA mirëpret nismat që kontribuojnë në forcimin e tregtisë dypalëshe dhe rritjen ekonomike në të dy vendet.
Tutje theksohet se Doganа e Kosovës rikonfirmoi përkushtimin e saj për vazhdimin e reformave dhe modernizimin e proceseve doganore, në bashkëpunim të ngushtë me partnerët ndërkombëtarë.
