Një seri shpërthimesh të fuqishme tronditën një park industrial pranë kryeqytetit argjentinas, Buenos Aires, të premten në mbrëmje, duke shkaktuar një zjarr të madh që plagosi të paktën 22 persona. Tymi i zi i dendur u ngrit qindra metra në ajër dhe zjarrfikësit po luftonin ende me flakët të shtunën në mëngjes, raporton France24.
“Zjarri është i madh”
“Shpërthimet dhe zjarret që shpërthejnë në fabrika të ndryshme janë të mëdha”, tha Gaston Granados, kryebashkiaku i Ezeizës, zonës ku ndodhet parku industrial. “Po përpiqemi ta kontrollojmë zjarrin dhe ta shuajmë, por deri më tani nuk kemi pasur sukses”, shtoi ai në një deklaratë për televizionin lokal, duke vënë në dukje se forca e shpërthimit shkatërroi edhe dritaret e shtëpisë së tij dhe se banorët po evakuoheshin.
Fabian Garcia, drejtor i mbrojtjes civile për provincën e Buenos Aires, konfirmoi se situata ishte jashtëzakonisht e vështirë. “Është një zjarr kompleks. Do të duhet shumë kohë për ta shuar”, tha ai.
Pesë fabrika të shkatërruara
Sipas mediave lokale, shpërthime dhe zjarre goditën pesë fabrika në kompleks, ku ndodhen kompani që prodhojnë goma, kimikate dhe mallra të tjera. Gazetarët e AFP në vendngjarje raportuan se të paktën një fabrikë u dogj plotësisht.
Drejtori i spitalit, Carlos Santoro, konfirmoi se institucioni i tij kishte pranuar 22 të plagosur. Midis tyre ishte një pacient me atak në zemër dhe një grua shtatzënë me probleme të frymëmarrjes.
