Ambasada e Republikës së Kosovës në Lubjanë ka kërkuar që të gjithë shtetasit e Kosovës të cilët kanë mbetur pa targa të veturave, të lajmërohen për këshilla dhe asistencë lidhur me kthimin e tyre në vend.
“Ambasada e Republikës së Kosovës në Lubjanë njofton të gjithë shtetasit e Republikës së Kosovës që kanë mbetur mbrëmë pa targa të automjeteve që të lajmërohen për këshilla dhe asistencë lidhur me kthimin në Kosovë. Nënkuptohet, rastet duhet të paraqiten fillimisht në Policinë e Republikës së Sllovenisë. Për informata shtesë ju lutemi kontaktoni linjën emergjente të Ambasadës në numrin: +386 31 465 221”, thuhet në njoftim.
Të shtunën kur u mbajt loja mes Kosovës dhe Sllovenisë është raportuar se disa prej atyre që udhëtuan me vetura, u janë marrë targat.
Në shenjë revolte nga humbja e pësuar, tifozët nikoqirë raportohet të kenë vjedhur targat e disa veturave që ishin me regjistrim të Republikës së Kosovës.
