Çmimi kryesor i turneut ndërkombëtar të boksit “Adem Jashari” ka shkuar për boksierin kosovar Shpëtim Bajoku, i cili në përballjen kryesore ka triumfuar ndaj kroatit Hrvoje Kraljevic.
Turneu i mbajtur për dy ditë në Prishtinë.
Dueli mes boksierit kosovar me atë kroat është vlerësuar si kryesori, me Bajokun që është shpallur edhe boksieri më i mirë i turneut.
Ndërkohë, çmimi për boksierin më të mirë të huaj i është dhënë pikërisht kroatit Kraljevic.
Si boksieri më i mirë vendor është shpallur Taulant Jakupi, pas paraqitjeve të tij të qëndrueshme dhe bindëse gjatë turneut.
Çmimi “Fair Play” ka shkuar për boksierin kosovar Jozef Rasi nga KB “Gjakova”. Rasi është vlerësuar për sjellje sportive, ndërsa në ring kishte mposhtur Planet Berishën në kategorinë deri në 75 kilogramë.
Për çiftin më luftarak, juria e turneut ka ndarë çmimin për duelin mes Lumtrim Gjogjaj dhe sllovakut Erik Catona.
Ndërsa çmimi për teknikën më të mirë i është dhënë bullgarit Blagoves Nedelcev, i cili ka shfaqur nivel të lartë teknik dhe ka fituar ndaj Leutrim Berishës.
