Trepça ka shënuar fitore ndaj Rahovecit 029 me rezultat 92:78, në javën e gjashtë të ProCredit Superligës. Kurse Në Gjakovë, Sigal Prishtina është kthyer te fitorja duke mposhtur Vëllaznimin me rezultat 86:91.
Në Mitrovicë, deri në dhjetë minutat e fundit ndeshja ka qenë e baraspeshuar, por vendasit në fund kanë dominuar plotësisht.
Mitrovicasit e kanë nisur më mirë takimin dhe e kanë fituar çerekun e parë 21:16, ndërsa Rahoveci është rikthyer në periodën e dytë dhe ka shkuar në pushim me epërsi minimale 35:36. Në pjesën e tretë Trepça është shkëputur sërish deri në dhjetë pikë, por mysafirët e kanë ngushtuar rezultatin në 65:61 pas tridhjetë minutash. Megjithatë, çereku i fundit ka qenë plotësisht në favor të Trepçës, që ka triumfuar 92:78.
Drilon Hajrizi shkëlqeu për Trepçën me njëzet e pesë pikë, shtatë kërcime dhe gjashtë asistime. Te Rahoveci më i miri ka qenë Isiah Umipig me njëzet pikë dhe gjashtë asistime.
E ndeshja në Gjakovë është karakterizuar me shumë luhatje, por kryeqytetasit e kanë kontrolluar lojën në pjesën e dytë.
Vëllaznimi e ka fituar çerekun e parë 21:17, por Prishtina ka reaguar në periodën e dytë dhe ka shkuar në pushim me epërsi 37:44. Në çerekun e tretë bardhekaltërit janë larguar deri në gjashtëmbëdhjetë pikë, por vendasit e kanë ngushtuar diferencën në 60:69. Edhe dhjetë minutat e fundit kanë sjellë dramë: Prishtina ka pasur sërish gjashtëmbëdhjetë pikë epërsi, por Vëllaznimi e ka ulur rezultatin në 84:88, para se mysafirët të mbyllnin ndeshjen në 86:91.
Te Vëllaznimi më i dalluari ka qenë Marques Warrick me njëzet e katër pikë, ndërsa për Prishtinën më i miri ka qenë Adrio Bailey me njëzet e pesë pikë dhe shtatë kërcime.
