Ushtarë nga Letonia dhe personel i Aviacionit të Ushtrisë së Shteteve të Bashkuara, të caktuar në Komandën Rajonale-Lindje të misionit të udhëhequr nga NATO, KFOR, kanë zhvilluar trajnim me sling load në Kampin në Novosellë.
Trajnimi me me ngarkesë me litar (sling load) u mundëson njësive të aviacionit të KFOR-it të transportojnë furnizime thelbësore në mënyrë të shpejtë dhe të sigurt, edhe në kushte kërkuese. Aktiviteti fokusohet në përmirësimin e shpejtësisë operacionale, saktësisë dhe efikasitetit, ndërsa forcon edhe ndërveprimin mes elementeve shumëkombëshe.
Sipas misionit, këto seanca të vazhdueshme trajnimi sigurojnë që forcat e KFOR-it të mbeten të gatshme për misionin dhe të afta të reagojnë në mënyrë efektive ndaj kërkesave logjistike në mjedise dinamike, duke kontribuar në ruajtjen e një ambienti të sigurt për të gjithë njerëzit në Kosovë.
KFOR nënvizon se vazhdon të zbatojë mandatin e tij, të bazuar në Rezolutën e Këshillit të Sigurimit të OKB-së, për të kontribuar në një ambient të sigurt për të gjitha komunitetet në Kosovë dhe për garantimin e lirisë së lëvizjes, në çdo kohë dhe në mënyrë të paanshme.
