Zëvendëskryeministrja dhe Ministrja në detyrë e Punëve të Jashtme dhe Diasporës, Donika Gërvalla, ka udhëtuar për në Romë me ftesë të zëvendëskryeministrit dhe ministrit të Jashtëm të Italisë, Antonio Tajani. Ajo do të përfaqësojë Kosovën në Konferencën e parë Ndërkombëtare të Italofonisë, që mbahet më 17–18 nëntor 2025.
Konferenca, e organizuar nga Ministria e Punëve të Jashtme të Italisë në bashkëpunim me Shoqatën “Dante Alighieri”, synon promovimin e gjuhës italiane si urë komunikimi dhe bashkëpunimi kulturor ndërmjet vendeve të ndryshme, njofton MPJD.
“Diskutimet do të fokusohen në forcimin e identitetit të përbashkët, dialogut ndërkulturor, nxitjen e paqes, zhvillimin ekonomik dhe diplomacinë kulturore. Italofonia pritet të prezantohet si një platformë e re për zhvillim dhe rritje ekonomike në hapësirat ku flitet italishtja”, njofton MPJD.
Sipas MPJD-së, pjesëmarrja e Gërvallës në këtë nismë vjen në kuadër të marrëdhënieve të shkëlqyera kulturore dhe miqësore me Italinë, si dhe angazhimit të vazhdueshëm për promovimin e dialogut ndërkombëtar.
Gjatë qëndrimit në Romë, ajo do të theksojë rolin e mërgatës sonë shqiptare në Itali si një urë të rëndësishme kulturore dhe gjuhësore, që forcon dita-ditës bashkëpunimin dypalësh si dhe atë rajonal.
